കടലിലിറങ്ങുമ്പോൾ വേണം ജാഗ്രത

കടലിന്റെ സൗന്ദര്യം കാണാനെത്തുന്നവരുടെ സന്തോഷം ദുഃഖത്തിലേക്ക് വഴിമാറുകയാണ് പയ്യാമ്പലം തീരത്ത്. സഞ്ചാരികൾ അപകടത്തിൽപ്പെടുന്നത് തീരത്ത് തുടർക്കഥയാവുകയാണ്.
ബുധനാഴ്ച കുളിക്കുന്നതിനിടെ അതിഥി തൊഴിലാളികളായ ത്രിപുര സ്വദേശി ധർമേന്ദ്ര, റസ്റ്റോ ജോയ് റെൻക് എന്നിവർ ഒഴുക്കിൽപ്പെട്ടതാണ് ഒടുവിലത്തെ സംഭവം. ലൈഫ് ​ഗാർഡുമാരുടെ അവസരോചിതമായ ഇടപെടലാണ് ഇവരെ ജീവിതത്തിലേക്ക് തിരിച്ചുകെണ്ടുവന്നത്. ഞായർ പകൽ 2.30ന് മടിക്കേരിയിൽനിന്നും വിനോദ സഞ്ചാരത്തിനെത്തിയ പതിനഞ്ചുകാരൻ സുജൻ കുളിക്കുന്നതിനിടെ ഒഴുക്കിൽപ്പെട്ട് മരിച്ചിരുന്നു. കൂടെ കുളിക്കുകയായിരുന്ന അമ്മാവൻ ഉൾപ്പെടെ മൂന്നുപേരെ ലൈഫ് ​ഗാർഡുമാർ രക്ഷപ്പെടുത്തി. ഒരാഴ്ച മുമ്പ്‌ പുതുതായി നിർമിക്കുന്ന പുലിമുട്ടിന് സമീപം കടലിലിറങ്ങിയ അതിഥി തൊഴിലാളി തിരയിൽപ്പെട്ടപ്പോഴും രക്ഷകരായത് ലൈഫ് ​ഗാർഡുമാരാണ്. കടൽ കാണുമ്പോഴുണ്ടാകുന്ന അമിതാവേശവും സുരക്ഷാ മാനദണ്ഡങ്ങൾ പാലിക്കാത്തതുമാണ് പലപ്പോഴും അപകടങ്ങൾക്ക് കാരണമാവുന്നതെന്ന് ലൈഫ് ​ഗാർഡ് ചാൾസൺ ഏഴിമല പറഞ്ഞു. ഏതാനും ദിവസങ്ങളായി കടൽ പ്രക്ഷുബ്ധമായതിനാൽ വെള്ളത്തിലിറങ്ങുന്നവർ ശ്രദ്ധിക്കണമെന്ന് തീരത്തെത്തുന്നവർക്ക് ലൈഫ് ​ഗാർഡുമാർ കർശന നിർദേശം നൽകിയിരുന്നു. ഇത് അവ​ഗണിച്ചും നിരവധിപേർ കടലിലിറങ്ങി. രാവിലെ എട്ടുമുതൽ രാത്രി ഏഴുവരെ മുഴുവൻ സമയവും ലൈഫ് ​ഗാർഡുമാർ തീരത്തുണ്ട്. പയ്യാമ്പലം മുതൽ പള്ളിയാംമൂലവരെയുള്ള ഭാ​ഗങ്ങളിൽ സഞ്ചാരികൾ എത്തുന്നതിനാൽ തിരക്കേറുന്ന സമയങ്ങളിൽ എല്ലാഭാ​ഗത്തും ഇവർക്കെത്താനാകുന്നില്ല.
നിർമാണം നടക്കുന്ന പുലിമുട്ടിന്റെ ഭാ​ഗത്ത് ചുഴികൾ രൂപപ്പെട്ടതിനാൽ അപകടമേറുകയാണ്‌. സഞ്ചാരികളുടെ സുരക്ഷ വർധിപ്പിക്കാൻ കൂടുതൽ ലൈഫ് ​ഗാർഡുമാരെ തീരത്ത് നിയോ​ഗിക്കാൻ ഡിടിപിസി തീരുമാനിച്ചിട്ടുണ്ട്.
പയ്യാമ്പലത്ത് 
തിരയിലകപ്പെട്ട 
അതിഥിത്തൊഴിലാളികളെ 
രക്ഷിച്ചു
കണ്ണൂർ
പയ്യാമ്പലത്ത് കടലിൽ കുളിക്കുന്നതിനിടെ തിരയിലകപ്പെട്ട രണ്ട് അതിഥിതൊഴിലാളികളെ ലൈഫ് ​ഗാർഡുമാർ രക്ഷപ്പെടുത്തി. താവക്കര സ്കൈപാലസ് ഹോട്ടലിലെ ജീവനക്കാരായ ത്രിപുര സ്വദേശി ധർമേന്ദ്ര, റസ്റ്റോ ജോയ് റെൻക് എന്നിവരാണ്‌ ബുധൻ പകൽ 2.30ന്‌ ഒഴുക്കിൽപ്പെട്ടത്. പുതുതായി നിർമിക്കുന്ന പുലിമുട്ടിന്റെ സമീപത്ത് കടലിൽ ഇറങ്ങിയപ്പോഴാണ് ഒഴുക്കിൽപ്പെട്ടത്. തീരത്ത് ഡ്യൂട്ടിയിലുണ്ടായിരുന്ന ലൈഫ് ​ഗാർഡുമാരായ ടി സനൂജ്, ഡേവിഡ് ജോൺസൺ, കോസ്റ്റൽ വാർഡൻ മുഹമ്മദ് ഫമീസ് എന്നിവർ ചേർന്നാണ് രക്ഷപ്പെടുത്തിയത്. ഞായറാഴ്ച തീരത്ത് കുളിക്കാനിറങ്ങിയ മടിക്കേരി സ്വദേശി സുജൻ തിരയിലകപ്പെട്ട് മരിച്ചിരുന്നു. ഒപ്പമുണ്ടായിരുന്നവരെ ലൈഫ് ​ഗാർഡുമാരാണ് രക്ഷപ്പെടുത്തിയത്.