കണ്ണൂർ: പകർച്ചവ്യാധി നിയന്ത്രണവുമായി ബന്ധപ്പെട്ട ആരോഗ്യ ജാഗ്രത പദ്ധതിയുടെ മാർഗരേഖ പുറത്തുവന്നപ്പോൾ ജില്ലയിൽ 11 ഡെങ്കിപ്പനി ഹോട്ട്സ്പോട്ടുകളും 8 മന്ത് രോഗ ഹോട്ട്സ്പോട്ടുകളും. കണ്ണൂർ കോർപ്പറേഷൻ, തലശ്ശേരി നഗരസഭ, എന്നിവിടങ്ങളിലും ഉളിക്കൽ, പായം, ചിറ്റാരിപ്പറമ്പ, പെരിങ്ങോം-വയക്കര, ചെറുപുഴ, ആലക്കോട്, അയ്യൻകുന്ന്, കോളയാട്, മുഴക്കുന്ന് പഞ്ചായത്തുകളിലുമാണ് ഡെങ്കി ഹോട്ട്സ്പോട്ടുകളുള്ളത്. കണ്ണൂർ കോർപ്പറേഷൻ, തലശ്ശേരി നഗരസഭ, ചിറക്കൽ, ഉളിക്കൽ, അഴീക്കോട്, പായം, കോളയാട്, ആറളം എന്നിവിടങ്ങളിൽ മന്ത് ഹോട്ട്സ്പോട്ടുകളും പ്രഖ്യാപിച്ചു. ജില്ല കളക്ടർ എസ്.ചന്ദ്രശേഖർ, ജില്ലാ ആരോഗ്യ സർവയലൻസ് ഓഫീസർ ഡോ. എം.പി ജീജ, ജില്ല മെഡിക്കൽ ഓഫീസർ ഡോ. കെ. നാരായണ നായിക് എന്നിവരുടെ സാന്നിദ്ധ്യത്തിൽ നടത്തിയ യോഗത്തിലാണ് വിലയിരുത്തൽ. വിവിധ വകുപ്പുകൾ ഏകീകരിച്ചു കൊണ്ട് രോഗ നിയന്ത്രണത്തിനായുള്ള പ്രവർത്തനങ്ങൾ നടത്തണമെന്ന് ജില്ല കളക്ടർ നിർദ്ദേശം നൽകി