കണ്ണൂർ > വിഷു –- റംസാൻ ആഘോഷകാലത്ത്‌ അവധിക്കാല യാത്രക്കാരെ തഴഞ്ഞ്‌ റെയിൽവേ. യാത്രക്കാരുടെ എണ്ണം ഇരട്ടിയിലേറെ വർധിക്കുന്ന സമയത്ത്‌ ആവശ്യത്തിന്‌ പ്രത്യേക ട്രെയിനുകൾ അനുവദിക്കാതെയാണ്‌ അവഗണന. രാജ്യത്ത്‌ 217 പ്രത്യേക ട്രെയിനുകൾ അനുവദിച്ചപ്പോൾ കേരളത്തിന്‌ ചെന്നൈ, ബംഗളൂരു, പുണെ എന്നിവിടങ്ങളിലേക്ക്‌ മൂന്ന് ട്രെയിനേയുള്ളൂ.
വിഷു, ഈസ്‌റ്റർ, റംസാൻ ആഘോഷം ഒരേ മാസമായതോടെ മുൻവർഷത്തേക്കാൾഇരട്ടിയിലേറെയാണ്‌ യാത്രക്കാർ. വേനലവധിക്കാലത്ത്‌ വിനോദസഞ്ചാരത്തിന്‌ പോകുന്ന കുടുംബങ്ങളും ഏറെ. ചുട്ടുപൊള്ളുന്ന ചൂടിനെ ഒഴിവാക്കാൻഏറെപേരും എസി ചെയർകാറുകളാണ്‌ തെരഞ്ഞെടുക്കുന്നത്‌. എസി കമ്പാർട്ട്‌മെന്റുകൾ കൂടിയെങ്കിലും ജനറൽ ടിക്കറ്റുകളിൽ യാത്രചെയ്യുന്നവർ തിരക്കിലമരുകയാണ്‌. ചെന്നൈ, ബംഗളൂരു, ഡൽഹി എന്നിവിടങ്ങളിൽനിന്ന്‌ നാട്ടിലേക്ക്‌ ട്രെയിൻബുക്ക്‌ ചെയ്യാൻപോലും സാധിക്കുന്നില്ല. ആവശ്യത്തിന്‌ പ്രത്യേക ട്രെയിൻഅനുവദിക്കണമെന്ന യാത്രക്കാരുടെ ആവശ്യം കണ്ടില്ലെന്ന്‌ നടിക്കുകയാണ്‌ റെയിൽവേ.