സപ്ലൈകോ ഹൈപ്പര്‍ മാര്‍ക്കറ്റുകളിലും പീപ്പിള്‍സ് ബസാറുകളിലും സബ്‌സിഡി നിരക്കില്‍ വില്പന നടത്തുന്നതിനുവേണ്ടി ഇന്നു മുതല്‍ റേഷന്‍ കാര്‍ഡ് ബാര്‍ കോഡ് സ്‌കാനിംഗ് സംവിധാനം ഉപയോഗപ്പെടുത്തണമെന്ന് ഔട്ട്‌ലെറ്റ് മാനേജര്‍മാര്‍ക്ക് സപ്ലൈകോ നിര്‍ദേശം നല്‍കി.
സ്‌കാനര്‍ ഉപയോഗിച്ച് കാര്‍ഡ് നമ്പര്‍ എന്‍റര്‍ ചെയ്യുമ്പോള്‍ തെറ്റുകള്‍ വരാനുള്ള സാധ്യത കുറയുമെന്നതിനാലാണ് ഇത് ഉപയോഗപ്പെടുത്താന്‍ നിര്‍ദേശിച്ചിരിക്കുന്നതെന്നും സപ്ലൈകോ അറിയിച്ചു. ഫിസിക്കല്‍ റേഷന്‍ കാര്‍ഡോ അല്ലെങ്കില്‍ മൊബൈല്‍ ഫോണിലെ ഡിജിലോക്കറില്‍ സൂക്ഷിച്ചിട്ടുള്ള റേഷന്‍ കാര്‍ഡോ, സപ്ലൈകോ ഔട്ട്‌ലെറ്റുകളില്‍നിന്ന് സബ്‌സിഡി സാധനങ്ങള്‍ വാങ്ങുന്നതിനായി ഉപഭോക്താക്കള്‍ ഹാജരാക്കണമെന്ന് സപ്ലൈകോ ചെയര്‍മാനും മാനേജിംഗ് ഡയറക്ടറുമായ ഡോ. സഞ്ജീബ് പട്‌ജോഷി അറിയിച്ചു.
ഉപഭോക്താക്കളുടെ അറിവോ സമ്മതമോ ഇല്ലാതെ റേഷന്‍ കാര്‍ഡ് നമ്പര്‍ എന്‍റര്‍ ചെയ്ത് സബ്‌സിഡി ദുരുപയോഗം ചെയ്യുന്നതു സംബന്ധിച്ച് പരാതികള്‍ ഉയര്‍ന്ന സാഹചര്യത്തിലാണു സപ്ലൈകോ ബാര്‍കോഡ് സ്‌കാന്‍ ചെയ്യുന്നതു സംബന്ധിച്ച നിര്‍ദേശം ഔട്ട്‌ലെറ്റ് മാനേജര്‍മാര്‍ക്ക് നല്‍കിയിരിക്കുന്നത്.
സപ്ലൈകോ വില്പനശാലകളിലൂടെ 13 ഇനം സാധനങ്ങളാണ് സബ്‌സിഡി നിരക്കില്‍ വില്പന നടത്തുന്നത്. റേഷന്‍ കാര്‍ഡുകള്‍ പുസ്തകരൂപത്തില്‍ മാത്രമായിരുന്ന സമയത്ത് സബ്‌സിഡി വിതരണം സപ്ലൈകോ വില്പനശാലകളില്‍നിന്ന് അതത് റേഷന്‍ കാര്‍ഡുകളില്‍ രേഖപ്പെടുത്തി നല്‍കിയിരുന്നു.
എന്നാല്‍ പൊതുവിതരണ വകുപ്പില്‍നിന്ന് നിലവില്‍ അനുവദിക്കുന്ന റേഷന്‍ കാര്‍ഡുകള്‍ ലാമിനേറ്റഡ് കാര്‍ഡ് രൂപത്തില്‍ ഉള്ളതിനാല്‍ സബ്‌സിഡി സാധനങ്ങള്‍ വാങ്ങുന്നത് കാര്‍ഡില്‍ രേഖപ്പെടുത്താന്‍ കഴിയുകയില്ല. ഇത് നിരവധി പരാതികള്‍ക്കും തര്‍ക്കങ്ങള്‍ക്കും ഇടയാക്കിയിരുന്നു. ഇത്തരം പരാതികള്‍ ഒരു പരിധി വരെ ഒഴിവാക്കാന്‍ കാര്‍ഡ് സ്‌കാന്‍ ചെയ്യുന്നതിലൂടെ കഴിയും.
സപ്ലൈകോ സൂപ്പര്‍മാര്‍ക്കറ്റുകളിലും മാവേലി സൂപ്പര്‍ സ്റ്റോറുകളിലും വരും ദിവസങ്ങളില്‍ ഈ സംവിധാനം വ്യാപിപ്പിക്കുമെന്ന് സപ്ലൈകോ എംഡി അറിയിച്ചു.