സിനിമാതാരങ്ങള്‍, രാഷ്‌ട്രീയനേതാക്കള്‍ തുടങ്ങിയ സെലിബ്രിറ്റികളുടെ പോസ്റ്ററുകളും വലിയ ഫോട്ടോകളുമായി പതിനെട്ടാംപടി കയറാനോ സന്നിധാനത്തു ദര്‍ശനം നടത്താനോ ഭക്തരെ അനുവദിക്കരുതെന്നു ഹൈക്കോടതി ഉത്തരവിട്ടു.
അന്തരിച്ച കന്നട നടന്‍ പുനീത് രാജ്കുമാറിന്‍റെയും മറ്റും വലിയ ചിത്രങ്ങളുമായി ശബരിമലയില്‍ ദര്‍ശനത്തിനെത്തുന്നവരുടെ ഫോട്ടോകള്‍ ഒരു അയ്യപ്പഭക്തന്‍ ഹൈക്കോടതി രജിസ്ട്രാര്‍ ജനറലിന് അയച്ചുകൊടുത്തിരുന്നു.
ഇതേത്തുടര്‍ന്ന് സ്വമേധയാ പരിഗണിച്ച ഹര്‍ജിയില്‍ ജസ്റ്റീസ് അനില്‍ കെ. നരേന്ദ്രന്‍, ജസ്റ്റീസ് പി.ജി. അജിത് കുമാര്‍ എന്നിവരുള്‍പ്പെട്ട ബെഞ്ചാണ് ഉത്തരവു നല്‍കിയത്. ഭക്തരുടെ ആരാധനയ്ക്കുള്ള അവകാശം ആചാരാനുഷ്ഠാനങ്ങളുടെ അടിസ്ഥാനത്തിലാകണമെന്നും നിർദേശിച്ചു.