ശബരിമലയില്‍ അരവണ നിര്‍മിക്കാൻ ഉപയോഗിക്കുന്ന ഏലക്കയില്‍ സുരക്ഷിതമല്ലാത്തവിധത്തില്‍ കീടനാശിനി അടങ്ങിയിട്ടുണ്ടെന്ന് തിരുവനന്തപുരം അനലിറ്റിക്കല്‍ ലാബില്‍നിന്നുള്ള പരിശോധനാ റിപ്പോര്‍ട്ടില്‍ പറയുന്നു.
ഹൈക്കോടതി നിര്‍ദേശത്തെത്തുടര്‍ന്നാണ് ലാബില്‍ പരിശോധന നടത്തിയത്. ജസ്റ്റീസ് അനില്‍ കെ. നരേന്ദ്രന്‍, ജസ്റ്റീസ് പി.ജി. അജിത് കുമാര്‍ എന്നിവരുള്‍പ്പെട്ട ഡിവിഷന്‍ ബെഞ്ച് പരിശോധനാ റിപ്പോര്‍ട്ട് ഇന്നു പരിഗണിക്കും.
അരവണ നിര്‍മാണത്തിനുപയോഗിക്കുന്ന ഏലക്കയുടെ ഗുണ നിലവാരം അനലിറ്റിക്കല്‍ ലാബില്‍ പരിശോധിക്കണമെന്നാവശ്യപ്പെട്ട് മുമ്പ് ഇവിടെ ഏലക്ക സപ്ലൈ ചെയ്തിരുന്ന അയ്യപ്പ സ്‌പൈസസ് കമ്പനി ഉടമ എസ്. പ്രകാശ് നല്‍കിയ ഹര്‍ജിയിലാണു ഹൈക്കോടതി ഇവ പരിശോധിക്കാന്‍ നിര്‍ദേശം നല്‍കിയത്.
ഏലക്ക ശേഖരിക്കാനായി ഓപ്പണ്‍ ടെൻഡര്‍ വിളിക്കാതെ ലോക്കല്‍ പര്‍ച്ചേസാണു നടത്തിയതെന്നും ഇത് അഴിമതിക്കു വഴിയൊരുക്കാനാണെന്നും ഹര്‍ജിക്കാരന്‍ ആരോപിച്ചിരുന്നു.