സംസ്ഥാനത്തെ എല്ലാ ജില്ലകളിലും കോവിഡ് ജാഗ്രതാ നിർദേശം നൽകി സർക്കാർ. പുതിയ കോവിഡ് വകഭേദത്തിന് വ്യാപനശേഷി കൂടുതലാണെന്നും എല്ലാ ജില്ലകളിലും പ്രതിരോധ പ്രവർത്തനങ്ങളും നിരീക്ഷണവും ശക്തമാക്കണമെന്നും ആരോഗ്യ മന്ത്രി വീണാ ജോർജ് അറിയിച്ചു. കോവിഡ് വ്യാപന ആശങ്കകൾക്കിടെ സംഘടിപ്പിച്ച റാപിഡ് റെസ്പോൺസ് ടീം യോഗത്തിലാണ് മന്ത്രി ഈ നിർദേശങ്ങൾ നൽകിയത്.
ആശങ്ക വേണ്ടെന്ന് പറഞ്ഞ മന്ത്രി, അവധിക്കാലത്ത് കൂടുതൽ ജാഗ്രത പുലർത്തണമെന്ന് അറിയിച്ചു. പ്രായമായവരെയും കുട്ടികളെയും പ്രത്യേകം ശ്രദ്ധിക്കണം. ഏവരും മാസ്ക് കൃത്യമായി ധരിക്കുകയും പുറത്ത് പോയി വന്നാൽ കൈകൾ ശുചിയാക്കുകയും വേണമെന്നും മന്ത്രി അറിയിച്ചു.
ആശുപത്രിയിലെ അഡ്മിഷൻ നിരീക്ഷിക്കണമെന്നും അവബോധ പ്രവർത്തനങ്ങൾ ശക്തമാക്കണമെന്നും ആരോഗ്യ വകുപ്പ് ഉദ്യോഗസ്ഥർക്ക് നിർദേശം നൽകിയ മന്ത്രി, രോഗികളുടെ വർധന മുന്നിൽ കണ്ട് ആശുപത്രികളിൽ കൂടുതൽ സൗകര്യങ്ങൾ ഉറപ്പാക്കണമെന്ന് അറിയിച്ചു.