സംസ്ഥാനത്ത് വാഹനാപകടങ്ങള് കുറയ്ക്കുവാനും റോഡ് സുരക്ഷ ഉറപ്പാക്കുവാനും ലക്ഷ്യമിട്ട് പോലീസ് ഗതാഗത വകുപ്പുമായി സഹകരിച്ചു നടപ്പിലാക്കുന്ന ‘ശുഭയാത്ര’ പദ്ധതിക്കു മികച്ച തുടക്കം.
കഴിഞ്ഞ മൂന്നു ദിവസത്തിനുള്ളിൽ ഗതാഗത നിയമലംഘനങ്ങൾ സംബന്ധിച്ച 2,298 സന്ദേശങ്ങളാണ് ചിത്രങ്ങളും വീഡിയോകളും സഹിതം വാട്സ്ആപ് നമ്പറിൽ ലഭിച്ചത്. അയച്ചുകിട്ടിയ സന്ദേശങ്ങളിൽ പരിശോധന നടത്തുകയും നിയമലംഘനം നടത്തിയവർക്കെതിരേ നടപടി സ്വീകരിക്കുകയും ചെയ്തുവരുന്നതായി അധികൃതർ അറിയിച്ചു.
പിഴചുമത്തൽ, താക്കീത്, ഫിറ്റ്നസ് സർട്ടിഫിക്കറ്റ്/ഡ്രൈവിംഗ് ലൈസൻസ് റദ്ദാക്കൽ ഉൾപ്പെടെയുള്ള നടപടികളാണ് സ്വീകരിച്ചിട്ടുള്ളത്. ലഭിച്ച സന്ദേശങ്ങളിൽ 881 എണ്ണത്തിൽ ഇതിനകം നടപടിയെടുത്തു.
മറ്റുള്ളവയിൽ അന്വേഷണം നടന്നുവരികയാണെന്നും പൊലീസ് പറഞ്ഞു. കെഎസ്ആർടിസി ബസുകൾ ഉൾപ്പെടെയുള്ള വാഹനങ്ങൾക്കെതിരെയും നടപടിയെടുത്തിട്ടുണ്ട്. ഇത്തരത്തിൽ ലഭിക്കുന്ന പരാതികൾ അതത് ജില്ലാ പോലീസിനും മോട്ടോർ വാഹന വകുപ്പിനും നടപടി സ്വീകരിക്കാനായി കൈമാറുകയാണ് ചെയ്യുന്നത്.