കൊച്ചി ∙ സ്ത്രീകൾക്കുനേരെയുള്ള ലൈംഗിക അതിക്രമം സംബന്ധിച്ച പരാതികൾ കൈകാര്യം ചെയ്യുന്നതിനായി മലയാള സിനിമകളുടെ ചിത്രീകരണ ലൊക്കേഷനുകളിൽ ആഭ്യന്തര പരാതി പരിഹാരസമിതികൾ രൂപീകരിക്കുന്നു. ചിത്രീകരണ സ്ഥലങ്ങളിൽ സമിതിയെക്കുറിച്ചുള്ള അറിയിപ്പു നോട്ടിസ് പതിക്കുന്നതിനുള്ള ഡിസൈനും ലോഗോയും കേരള ഫിലിം ചേംബർ ചലച്ചിത്ര നിർമാതാക്കൾക്കു കൈമാറി.
നോട്ടിസിൽ 5 കമ്മിറ്റി അംഗങ്ങളുടെ പേരുകളും പദവികളും ഫോൺ നമ്പറും ഉൾപ്പെടുത്തും. ലൊക്കേഷനു പുറത്തു നിന്നുള്ള നിഷ്പക്ഷ അംഗവും കമ്മിറ്റിയിലുണ്ടാകും.
ഫിലിം ചേംബറിന്റെ നേതൃത്വത്തിൽ ജൂണിൽ ചലച്ചിത്ര സംഘടനകൾ യോഗം ചേർന്നു പരാതി പരിഹാര സെൽ രൂപീകരണത്തിനു നിരീക്ഷണ സമിതി രൂപീകരിച്ചിരുന്നു. ചലച്ചിത്ര മേഖലയിലെ 9 സംഘടനകളിൽ നിന്നായി 3 പേരെ വീതമാണു സമിതിയിൽ ഉൾപ്പെടുത്തിയത്. ഫിലിം ചേംബർ പ്രസിഡന്റ് ജി.സുരേഷ് കുമാറാണു മേൽനോട്ട സമിതി അധ്യക്ഷൻ.സിനിമയുടെ വിശദാംശങ്ങൾക്കൊപ്പം കമ്മിറ്റി രൂപീകരിച്ചതിന്റെ രേഖയും പ്രൊഡ്യൂസേഴ്സ് അസോസിയേഷനു കൈമാറണമെന്നാണു നിർദേശം. ടിവി സീരിയൽ, ഒടിടി, ആൽബം തുടങ്ങിയവയുടെ ലൊക്കേഷനുകളിലും സമിതി രൂപീകരിക്കേണ്ടിവരും.