കണ്ണൂർ: പേരാവൂർ സ്പോർട്സ് ഫൗണ്ടേഷൻ വിവിധ സംഘടനകളുടെ സഹകരണത്തോടെ സംഘടിപ്പിക്കുന്ന പേരാവൂർ മാരത്തൺ നാലാം എഡിഷൻ ഡിസംബർ 24ന് നടക്കും. പേരാവൂർ ജിമ്മി ജോർജ് സ്റ്റേഡിയത്തിൽനിന്ന് ആരംഭിക്കുന്ന മാരത്തണിൽ ഇത്തവണ 3000 പേരെ പങ്കെടുപ്പിക്കാനാണ് ലക്ഷ്യമിടുന്നതെന്ന് സംഘാടകർ പത്രസമ്മേളനത്തിൽ പറഞ്ഞു.10.5 കിലോമീറ്റർ ക്വാർട്ടർ മാരത്തണും മൂന്നര കിലോമീറ്റർ ഫാമിലി ഫൺ റണ്ണുമാണ് നടക്കുക.
പേരാവൂർ മാരത്തൺ ഇവന്റ് അംബാസിഡറും ഒളിമ്പ്യനുമായ അഞ്ജു ബോബി ജോർജ് ഫ്ലാഗ് ഓഫ് ചെയ്യും. ഓപ്പൺ കാറ്റഗറിയിൽ ആൺ, പെൺ വിഭാഗത്തിൽ ഒന്നുമുതൽ മൂന്നുവരെ സ്ഥാനം നേടുന്നവർക്ക് യഥാക്രമം 10000, 5000, 3000 രൂപയും മെഡലും ലഭിക്കും.18 വയസിനു താഴെ ആൺ, പെൺ വിഭാഗത്തിൽ 5000, 3000, 2000 രൂപയും മെഡലും 50ന് (മിക്സഡ്) മുകളിൽ 5000, 3000, 2000 രൂപയും മെഡലുമാണ് ലഭിക്കുക. നാലു മുതൽ പത്തു വരെ സ്ഥാനക്കാർക്ക് 1000 രൂപ വീതം പ്രോത്സാഹന സമ്മാനവും ലഭിക്കും. www.peravoormarathon.com എന്ന വെബ്സൈറ്റിൽ ഓൺലൈനായി രജിസ്റ്റർ ചെയ്യാം. മത്സരത്തിന്റെ കാറ്റഗറി തിരിച്ചുള്ള വിശദവിവരങ്ങളും വിദ്യാർഥികൾക്കുള്ള പ്രവേശന ഫീസിലെ ഇളവുകളും വെബ്സൈറ്റിൽ ലഭ്യമാണ്. പേരാവൂർ ബ്ലോക്ക് പരിധിയിലെ തെരഞ്ഞെടുത്തയിടങ്ങളിൽ ഓഫ്ലൈനായും രജിസ്റ്റർ ചെയ്യാം. ഫോൺ: 8281130787, 9447263904. പത്രസമ്മേളനത്തിൽ പേരാവൂർ സ്പോർട്സ് ഫൗണ്ടേഷൻ വൈസ് പ്രസിഡന്റ് ഡെന്നി ജോസഫ്, ജനറൽ സെക്രട്ടറി എം.സി. കുട്ടിച്ചൻ, ഷിനോജ് നരിതൂക്കിൽ, സെബാസ്റ്റ്യൻ ജോർജ്, പ്രദീപൻ പുത്തലത്ത് എന്നിവർ പങ്കെടുത്തു.