മോട്ടോര്‍ വാഹനങ്ങളുമായി ബന്ധപ്പെട്ട കേന്ദ്ര നിയമങ്ങളും ഹൈക്കോടതി ഉത്തരവുകളും ലംഘിച്ച് ഒരു വാഹനം പോലും ഇന്നു മുതല്‍ നിരത്തിലുണ്ടാകരുതെന്ന് ഹൈക്കോടതി ഉത്തരവിട്ടു.
ഇത്തരം വാഹനങ്ങള്‍ നിരത്തില്‍ കണ്ടാല്‍ ആ നിമിഷം പിടിച്ചെടുക്കണം. ഒരു കാരണവശാലും ഇവ ഓടാന്‍ അനുവദിക്കരുത്. ഈ വാഹനങ്ങളുടെ ഫിറ്റ്നസ് സര്‍ട്ടിഫിക്കറ്റ് റദ്ദാക്കുകയും ഡ്രൈവറുടെ ലൈസന്‍സ് സസ്‌പെന്‍ഡ് ചെയ്യുകയും വേണം.
ഫിറ്റ്നസ് സര്‍ട്ടിഫിക്കറ്റ് റദ്ദാക്കലും ലൈസന്‍സ് സസ്‌പെന്‍ഡ് ചെയ്യലും കുറഞ്ഞതു മൂന്നു മാസത്തേക്കു വേണമെന്നും ജസ്റ്റീസ് അനില്‍ കെ. നരേന്ദ്രന്‍, ജസ്റ്റീസ് പി.ജി. അജിത് കുമാര്‍ എന്നിവരുള്‍പ്പെട്ട ഡിവിഷന്‍ ബെഞ്ചിന്‍റെ ഉത്തരവിലുണ്ട്.
നിയമ ലംഘനങ്ങളുള്ള വാഹനങ്ങള്‍ വിനോദ, പഠന യാത്രകള്‍ക്കു വിളിച്ചാല്‍ വിദ്യാഭ്യാസ സ്ഥാപനത്തിന്‍റെ മേധാവിക്കും യാത്രയുടെ ചുമതലയുള്ള അധ്യാപകനുമെതിരേ നടപടിയുണ്ടാകുമെന്നും ഡിവിഷന്‍ ബെഞ്ച് മുന്നറിയിപ്പു നല്‍കി.
മുളന്തുരുത്തി മാര്‍ ബസേലിയോസ് വിദ്യാനികേതന്‍ സ്‌കൂളില്‍ നിന്ന് വിദ്യാര്‍ഥികളുമായി വിനോദയാത്ര പോയ ടൂറിസ്റ്റ് ബസ് പാലക്കാട് വടക്കഞ്ചേരിയില്‍ അപകടത്തില്‍പ്പെട്ട് അഞ്ചു കുട്ടികളും ഒരു അധ്യാപകനുമടക്കം ഒമ്പതു പേര്‍ മരിച്ച സംഭവത്തെത്തുടര്‍ന്നാണ് ഹൈക്കോടതി കര്‍ശന നടപടിക്ക് ഉത്തരവിട്ടത്.