മാധ്യമ, വിനോദ വ്യവസായ മേഖലകളിലെ നിക്ഷേപം 2,030-ൽ 100 ബില്യണ്‍ ഡോളറായി ഉയര്‍ത്തണമെന്ന് കേന്ദ്ര ഇന്‍ഫര്‍മേഷന്‍ ആന്‍ഡ് ബ്രോഡ്കാസ്റ്റിംഗ് സെക്രട്ടറി അപൂര്‍വ ചന്ദ്ര. ഇന്ത്യയുടെ സമ്പദ്‌വ്യവസ്ഥ അടുത്ത 10 വര്‍ഷത്തിനുള്ളില്‍ 10 ട്രില്യണ്‍ ഡോളറായി വളരും.
മാധ്യമ-വിനോദ മേഖലയുടെ വികസനത്തിന് ആവശ്യമായ എല്ലാ സഹായവും ഇന്‍ഫര്‍മേഷന്‍ ആന്‍ഡ് ബ്രോഡ്കാസ്റ്റിംഗ് മന്ത്രാലയം നല്‍കുമെന്നും ഡറേഷന്‍ ഓഫ് ഇന്ത്യന്‍ ചേംബേഴ്‌സ് ഓഫ് കൊമേഴ്സ് ആന്‍ഡ് ഇന്‍ഡസ്ട്രിയുടെ ഫാസ്റ്റ് ട്രാക്ക് പ്രോഗ്രാം 2022 ന്‍റെ ഉദ്ഘാടന ചടങ്ങില്‍ അദ്ദേഹം പറഞ്ഞു.
ചലച്ചിത്ര മേഖലയില്‍ കൂടുതല്‍ വിദേശനിക്ഷേപം ആകര്‍ഷിക്കാന്‍ ഇന്‍വെസ്റ്റ് ഇന്ത്യ വികസിപ്പിക്കും. ഇതിനായി വിവിധ വിഭാഗങ്ങളെ മന്ത്രാലയം ഒരുമിച്ച് കൊണ്ടുവന്നിട്ടുണ്ട്. മുംബൈ ആസ്ഥാനമായി പ്രവര്‍ത്തിക്കുന്ന ദേശീയ ഫിലിം ഡെവലപ്മെന്‍റ് കോര്‍പ്പറേഷന്‍ സിനിമാ വ്യവസായത്തിന്‍റെ കേന്ദ്രമായി മാറുകയാണ്. ഇതിനായി സിനിമാ വ്യവസായത്തെ നവീകരിക്കും.
വ്യവസായത്തെ ആകര്‍ഷിക്കുന്നതിനായി കേന്ദ്ര സര്‍ക്കാര്‍ രൂപീകരിച്ച ഇന്‍വെസ്റ്റ് ഇന്ത്യക്ക് അത് കൈമാറും. 100 ബില്യണ്‍ ഡോളറിലധികം നേരിട്ടുള്ള വിദേശ നിക്ഷേപം ഈ വര്‍ഷം ഇന്ത്യയിലേക്ക് വരുമെന്നാണ് പ്രതീക്ഷിക്കുന്നത്. വിദേശ നിക്ഷേപം ആകര്‍ഷിക്കാന്‍ ഇന്‍വെസ്റ്റ് ഇന്ത്യയെ ഉപയോഗിക്കാന്‍ ആഗ്രഹിക്കുന്നു. ഇതിലൂടെ വിദേശ ചലച്ചിത്ര പ്രവര്‍ത്തകരെ ഇന്ത്യയിലേക്ക് കൊണ്ടുവരും.
ഇന്ത്യയിലെ സിനിമാ ഷൂട്ടിംഗ് സുഗമമാക്കുന്നതിനും പ്രോത്സാഹിപ്പിക്കുന്നതിനും വിവിധ സംസ്ഥാനങ്ങളുമായി സര്‍ക്കാര്‍ പ്രവര്‍ത്തിക്കും. സംസ്ഥാനങ്ങള്‍ നല്‍കുന്ന പ്രോത്സാഹനത്തോടെ ചലച്ചിത്ര പ്രവര്‍ത്തകര്‍ക്ക് അനുകൂലവും ആകര്‍ഷകവുമായ പദ്ധതിയായി ഇത് മാറുമെന്നും അദ്ദേഹം വ്യക്തമാക്കി.