വിവരാവകാശ നിയമപ്രകാരം രേഖകൾ ലഭ്യമാക്കാൻ പ്രത്യേക ഓൺലൈൻ പോർട്ടൽ അവതരിപ്പിക്കാനൊരുങ്ങി സുപ്രീം കോടതി. പൊതു അഥോറിറ്റികൾ വിവരാവകാശ നിയമപരിധിയിൽ പ്രവർത്തിക്കണമെന്ന ചട്ടത്തിന്റെ അടിസ്ഥാനത്തിലാണ് നടപടി.
സുപ്രീം കോടതി രേഖകൾ ഓൺലൈൻ വഴി ലഭ്യമാക്കാൻ പോർട്ടൽ തുറക്കണമെന്ന് ആവശ്യപ്പെട്ട് നിയമവിദ്യാർഥികളായ ആക്രിതി അഗർവാൾ, ലക്ഷ്യ പുരോഹിത് എന്നിവർ സമർപ്പിച്ച ഹർജി പരിഗണിക്കുന്നതിനിടെയാണ് ജസ്റ്റിസ് ഡി.വൈ. ചന്ദ്രചൂഡ് തീരുമാനം അറിയിച്ചത്.
സുപ്രീം കോടതിയുടെ ഇ-കമ്മിറ്റി വിവരാവകാശ ഓൺലൈൻ പോർട്ടലിന്റെ പണിപ്പുരയിലാണെന്നും നാല് ആഴ്ചകൾക്കുള്ളിൽ ഇത് ലഭ്യമാകുമെന്നും ജസ്റ്റിസ് ഹർജിക്കാരുടെ അഭിഭാഷകയെ അറിയിച്ചു. ഓൺലൈൻ സംവിധാനം വഴി കേസുകൾ സമർപ്പിക്കാമെങ്കിലും വിവരാവകാശ നിയമം വഴി കോടതി വിവരങ്ങൾ ആരായാൻ തപാൽ മാർഗത്തിലൂടെ മാത്രമാണ് സാധിക്കുക.