തെരുവുനായ പ്രശ്‌നത്തില്‍ ഹോട്ട്‌സ്‌പോട്ടുകള്‍ തിരിച്ചറിയാന്‍ കര്‍മപദ്ധതി രൂപീകരിച്ചു. ഇതിനായി മനുഷ്യരെയും വളര്‍ത്തുമൃഗങ്ങളെയും ആക്രമിച്ചത് സംബന്ധിച്ച വിവരങ്ങള്‍ പ്രത്യേകം ശേഖരിക്കും.
മൃഗങ്ങള്‍ക്കെതിരായ ആക്രമണങ്ങളുടെ വിവരങ്ങള്‍ മൃഗസംരക്ഷണ വകുപ്പും മനുഷ്യര്‍ക്കെതിരായ ആക്രമണങ്ങള്‍ സംബന്ധിച്ച വിവരങ്ങള്‍ ആരോഗ്യവകുപ്പും ശേഖരിക്കും. ഈ വിവരങ്ങള്‍ ഉപയോഗിച്ചാണ് തദ്ദേശവകുപ്പുകള്‍ ഹോട്ട്‌സ്‌പോട്ടുകള്‍ തയാറാക്കുന്നത്.
ഓരോ ഹോട്ട്‌സ്‌പോട്ടിലും തെരുവുനായ ശല്യം രൂക്ഷമാകാനുള്ള കാരണം എന്താണെന്ന് തിരിച്ചറിഞ്ഞ് അതിനുള്ള നടപടികളുമായി മുന്നോട്ട് പോകാനാണ് സര്‍ക്കാര്‍ തീരുമാനം. ഇത് സംബന്ധിച്ച ചര്‍ച്ചകള്‍ക്കായി തദ്ദേശമന്ത്രി എം.ബി.രാജേഷിന്‍റെ നേതൃത്വത്തില്‍ ജില്ലാ കളക്ടര്‍മാരുടെയും പഞ്ചായത്ത് പ്രസിഡന്‍റുമാര്‍ അടക്കമുള്ളവരുടെയും യോഗം ചേരും.
സംസ്ഥാനത്ത് ഈ വര്‍ഷം മാത്രം 43,521 വളര്‍ത്തുമൃഗങ്ങളെ തെരുവുനായ ആക്രമിച്ചതായാണ് മൃഗസംരക്ഷണവകുപ്പിന്‍റെ കണക്ക്. 2022 ജനുവരി മുതല്‍ ഓഗസ്റ്റ് വരെയുള്ള കണക്കനുസരിച്ചാണിത്. ഓരോ ജില്ലയിലും അയ്യായിരത്തോളം വളര്‍ത്തുമൃഗങ്ങള്‍ക്കെങ്കിലും കടിയേറ്റിട്ടുണ്ടെന്നാണ് നിഗമനം.