കാക്കി നിറത്തിലുള്ള യൂണിഫോം പോലീസിന് മാത്രമാക്കണമെന്ന് ഡിജിപി. ആശയക്കുഴപ്പം ഒഴിവാക്കാനാണിതെന്നാണ് വിശദീകരണം. നിലവില്‍ ഫയര്‍ഫോഴ്‌സ്,എക്‌സൈസ്,ജയില്‍,വനം സേന വിഭാഗങ്ങള്‍ക്കും ഹെല്‍ത്ത് ഇന്‍സ്‌പെക്ടര്‍മാര്‍,സ്റ്റുഡന്‍റ് പോലീസ് കേഡറ്റ് അധ്യാപകര്‍ എന്നിവരുടെയും യൂണിഫോം കാക്കിയാണ്.
ഇത് മാറ്റണമെന്നാണ് പോലീസ് മേധാവി സര്‍ക്കാരിനോട് ആവശ്യപ്പെട്ടിരിക്കുന്നത്. എഡിജിപിമാരുടെ യോഗത്തിലാണ് നിര്‍ദേശം ഉയര്‍ന്നത്. കേരള പോലീസ് ആക്ട് പ്രകാരം ഔദ്യോഗിക ആവശ്യങ്ങള്‍ക്ക് ഒരു പോലീസ് ഉദ്യോഗസ്ഥനല്ലാതെ മറ്റാര്‍ക്കും കാക്കി യൂണിഫോം ധരിക്കാന്‍ പാടില്ലെന്ന് നിഷ്‌കര്‍ച്ചിരിക്കെയാണ് മറ്റ് സേന വിഭാഗങ്ങളും യൂണിഫോം ധരിക്കുന്നതെന്നായിരുന്നു വിമര്‍ശനം.
ഇതേക്കുറിച്ച് ബറ്റാലിയന്‍ എഡിജിപിയുടെ നേത്യത്വത്തില്‍ തയ്യാറാക്കിയ റിപ്പോര്‍ട്ടാണ് ഡിജിപി സര്‍ക്കാരിന് നല്‍കിയിരിക്കുന്നത്. കാക്കി യൂണിഫോമിന് പുറമേ പോലീസിന് സമാനമായ സ്ഥാനചിഹ്നങ്ങളും ഉപയോഗിക്കുന്നു. ഇത് സമൂഹത്തില്‍ തെറ്റിദ്ധാരണ ഉണ്ടാക്കുന്നു എന്നും വിമര്‍ശനമുണ്ട്.
മോട്ടോര്‍ വാഹന ഉദ്യോഗസ്ഥര് വാഹന പരിശോധനക്കിടെ പ്രശ്‌നങ്ങളുണ്ടാക്കുമ്പോള്‍ പോലീസാണെന്ന് തെറ്റിദ്ധരിക്കുന്നുവെന്നും അതിനാല്‍ കാക്കി ധരിക്കുന്നവരുടെ കാര്യത്തില്‍ മാറ്റം കൊണ്ടുവരണമെന്നുമാണ് ശുപാര്‍ശയില്‍ പറയുന്നത്. ഇക്കാര്യത്തില്‍ അന്തിമ തീരുമാനം എടുക്കേണ്ടത് മുഖ്യമന്ത്രിയാണ്.