സംസ്ഥാനത്ത് ഇടുക്കി മെഡിക്കൽ കോളജിൽ 100 സീറ്റുകളിൽ എംബിബിഎസ് പ്രവേശനത്തിന് നാഷണൽ മെഡിക്കൽ കമ്മീഷൻ അംഗീകാരം നല്കയതോടെ ഈ വർഷം സംസ്ഥാനത്തെ സർക്കാർ മെഡിക്കൽ കോളജുകളിൽ ആകെ പ്രവേശനത്തിനായുള്ളത് 1655 സീറ്റുകൾ.
ഇടുക്കി മെഡിക്കൽ കോളജ് അംഗീകാരം സംബന്ധിച്ച് കഴിഞ്ഞദിവസമാണ് നാഷണൽ മെഡിക്കൽ കമ്മീഷന്‍റെ അറിയിപ്പ് സംസ്ഥാനത്തിനു ലഭിച്ചത്. സംസ്ഥാനത്ത് സർക്കാർ മെഡിക്കൽ കോളജുകളിൽ ഏറ്റവും കൂടുതൽ വിദ്യാർഥികൾക്ക് എംബിബിഎസ് പ്രവേശനം ലഭിക്കുന്നത് തിരുവനന്തപുരം,കോഴിക്കോട് മെഡിക്കൽ കോളജുകളിലാണ്. രണ്ടു കോളജുകളിലും 250 വിദ്യാർഥികൾക്കു വീതം പ്രവേശനം നല്കാനാണ് അനുമതിയുള്ളത്.
തൃശൂർ, കോട്ടയം, ആലപ്പുഴ സർക്കാർ മെഡിക്കൽ കോളജുകളിൽ 175 വിദ്യാർഥികൾക്ക് വീതമാണ് ഈ വർഷം പ്രവേശനത്തിന് അംഗീകാരമുള്ളതെന്ന് നാഷണൽ മെഡിക്കൽ കമ്മീഷൻ വ്യക്തമാക്കുന്നു. എറണാകുളം-110, പാലക്കാട്- 100, കൊല്ലം പാരിപ്പള്ളി-110, മലപ്പുറം-110, പരിയാരം-100, എന്നിങ്ങനെയാണ് മറ്റ് സർക്കാർ മെഡിക്കൽ കോളജുകളിലെ എംബിബിഎസ് പ്രവേശന സീറ്റുകൾ. ഇതു കൂടാതെയാണ് ഇന്നലെ ഇടുക്കി മെഡിക്കൽ കോളജിൽ 100 സീറ്റിലേക്ക് എംബിബിഎസ് പ്രവേശനത്തിന് അനുമതി ലഭിച്ചിട്ടുള്ളത്.
സ്വകാര്യമേഖലയിൽ 21 മെഡിക്കൽ കോളജുകളിലായി 2700 സീറ്റുകളിലേക്കാണ് നിലവിൽ എംബിബിഎസ് പ്രവേശനത്തിനായി അംഗീകാരം നല്കിയിട്ടുള്ളത്.