അരിക്ക് ഇന്നു മുതൽ രണ്ടു രൂപ മുതൽ മൂന്നു രൂപ വരെ വർധനയുണ്ടാകും. പാക്കറ്റിൽ വില്പന നടത്തുന്ന ഭക്ഷ്യധാന്യങ്ങൾക്കും പാൽ ഒഴികെയുള്ള പാലുത്പന്നങ്ങൾക്കും അഞ്ചു ശതമാനം ചരക്കു സേവന നികുതി ഏർപ്പെടുത്താനുള്ള തീരുമാനം ഇന്നു നിലവിൽ വരുന്നതോടെയാണ് വർധന നടപ്പിലാകുന്നത്. പാക്കറ്റിൽ അല്ലാതെ ചില്ലറയായി തൂക്കി നൽകുന്ന ഭക്ഷ്യധാന്യങ്ങൾക്കു വില ഉയരില്ല.
അരിയും ഭക്ഷ്യധാന്യങ്ങളും അടക്കമുള്ള ബ്രാൻഡഡ് ഉത്പന്നങ്ങൾക്ക് ഏർപ്പെടുത്തിയിരുന്ന നികുതി പാക്കറ്റിലാക്കി വിൽപന നടത്തുന്ന സാധനങ്ങൾക്കു കൂടി ബാധകമാക്കാൻ ജിഎസ്ടി കൗണ്‍സിൽ തീരുമാനിച്ചതോടെയാണ് ജനങ്ങൾക്ക് ഇരുട്ടടിയാകുന്നത്.
ഇപ്പോൾ വിപണിയിലുള്ള 75 ശതമാനത്തിനു മുകളിലുള്ള സാധനങ്ങൾക്കും ഇതോടെ നികുതി വേണ്ടി വരും. പാക്കറ്റിലുള്ള തൈര്, മോര്, ലസി എന്നിവയ്ക്കും അരി, ഭക്ഷ്യധാന്യങ്ങൾക്കും ബാങ്ക് നൽകുന്ന ചെക്ക് ബുക്കിനുമടക്കം വില കൂടും.
കോവിഡ് പ്രതിസന്ധിക്ക് ശേഷം സംസ്ഥാനങ്ങളുടെ നികുതിവരുമാനം ഗണ്യമായി കുറഞ്ഞിരുന്നു. കഴിഞ്ഞ മാസം മുതൽ ജിഎസ്ടി നടപ്പാക്കുന്നതുമായി ബന്ധപ്പെട്ട സംസ്ഥാനങ്ങൾക്കുള്ള നഷ്ടപരിഹാരം നൽകുന്നതും കേന്ദ്രസർക്കാർ നിർത്തിവച്ചു. ഈ സാഹചര്യത്തിൽ സംസ്ഥാനങ്ങളുടെ നികുതിവരുമാനം വർധിപ്പിക്കാനുള്ള നടപടിയുടെ ഭാഗമായാണ് നിത്യോപയോഗ സാധനങ്ങളെ നികുതിഘടനയിലേക്ക് കൊണ്ടുവന്നത്.
പാലുത്പന്നങ്ങളിൽ പാലിന് ഒഴികെ പാക്കറ്റിൽ എത്തുന്ന എല്ലാ ഇനങ്ങൾക്കും നികുതി നൽകണം. നേരത്തേ ബ്രാൻഡ് ചെയ്ത് വിൽക്കുന്ന അരി, പയർ, കടല, പരിപ്പ് തുടങ്ങിയ ധാന്യങ്ങൾക്ക് മാത്രമായിരുന്നു നികുതിയെങ്കിൽ ഇന്നുമുതൽ പാക്കറ്റിലാക്കി വിൽക്കുന്നവയ്ക്കെല്ലാം നികുതി നൽകേണ്ടിവരും. ഇതനുസരിച്ച് നികുതി നിയമത്തിലും മാറ്റം വരുത്തി. നികുതി വെട്ടിപ്പു തടയുന്നതിനാണ് ബ്രാൻഡഡ്, ബ്രാൻഡഡ് അല്ലാത്തത് എന്ന വ്യത്യാസമില്ലാതെ നികുതി ഏർപ്പെടുത്തിയതിന് കാരണമായി പറയുന്നത്. പ്രീപാക്ക് ചെയ്ത മാംസം (ഫ്രോസണ് അല്ലാത്തത്), മീൻ, ശർക്കര, തേൻ എന്നിവയ്ക്കും വില ഉയരും. ചെക്ക് ബുക്കിന് 18%ആണു പുതിയനികുതി. ഇത് ബാങ്ക് അക്കൗണ്ടിൽ നിന്ന് ഈടാക്കും.
ദിവസം 5,000 രൂപയ്ക്കു മുകളിൽ വാടകയുള്ള ആശുപത്രി മുറികൾക്ക് ഇന്നു മുതൽ 5% നികുതി ഈടാക്കും. ദിവസം 1,000 രൂപയിൽ താഴെയുള്ള ഹോട്ടൽമുറി വാടകയിൽ 12% നികുതി ചുമത്തും. നിലവിൽ ഇവ രണ്ടിനും ജിഎസ്ടി ബാധകമായിരുന്നില്ല.