ഐസിഎസ്ഇ പത്താം ക്ലാസ് പരീക്ഷയിൽ കേരളത്തിന് 100 ശതമാനം വിജയം. സംസ്ഥാനത്തെ 162 സ്കൂളുകളിൽ നിന്ന് പരീക്ഷ എഴുതിയ 7823 വിദ്യാർഥികളും ഉപരിപഠന യോഗ്യത നേടി. ഇതിൽ 4,113 പെണ്‍കുട്ടികളും 3,710 ആണ്‍കുട്ടികളും ഉൾപ്പെടുന്നു. കേരളത്തിൽ നിന്നുള്ള രണ്ടു വിദ്യാർഥികൾ മെറിറ്റ് പട്ടികയിൽ ദേശീയ തലത്തിൽ രണ്ടും മൂന്നും സ്ഥാനങ്ങളിൽ ഇടംനേടി.
തിരുവനന്തപുരം സെന്‍റ് തോമസ് റസിഡൻഷ്യൽ സ്കൂളിലെ എസ്.ജെ. ആതിര, ഗൗരി അരുണ്‍ എന്നിവരാണ് രണ്ടും മൂന്നും സ്ഥാനങ്ങളിൽ എത്തിയത്. എസ്.ജെ. ആതിര 99.6 ശതമാനം മാർക്ക് നേടി രണ്ടാം സ്ഥാനത്തെത്തിയപ്പോൾ ഗൗരി അരുണ്‍ 99.4 ശതമാനം മാർക്ക് സ്വന്തമാക്കി മൂന്നാം സ്ഥാനത്തെത്തി. സംസ്ഥാന തലത്തിൽ ആതിരയും ഗൗരിയുമാണ് ഒന്നും രണ്ടും സ്ഥാനം കരസ്ഥമാക്കിയത്.
99.20 ശതമാനം മാർക്ക് സ്വന്തമാക്കി തിരുവനന്തപുരം സെന്‍റ് തോമസ് റസിഡൻഷ്യൽ സ്കൂളിലെ വിഷ്ണു യു. പ്രഭു, തിരുവനന്തപുരം ലേ കോൾ ചെന്പക സ്കൂളിലെ മാളവിക കിഷോർ, ദേവശ്രീ വിഷ്ണു, എറണാകുളം മാർ അത്തനേഷ്യസ് ഇന്‍റർനാഷണൽ സ്കൂളിലെ ജോഷ്ബി ബിനി, നയന ഷാജി മേക്കുന്നേൽ എന്നിവർ സംസ്ഥാന തലത്തിൽ മൂന്നാം സ്ഥാനം പങ്കിട്ടു.