സംസ്ഥാനത്തു കുരങ്ങുപനി എത്തിയോയെന്ന സംശയത്തെത്തുടര്‍ന്ന് ഒരാളുടെ സാമ്പിള്‍ പരിശോധനയ്ക്കയച്ച സാഹചര്യത്തില്‍ സംസ്ഥാനങ്ങള്‍ക്കു കേന്ദ്രത്തിന്‍റെ ജാഗ്രതാ നിര്‍ദേശം. ഇതുസംബന്ധിച്ചു കേന്ദ്ര ആരോഗ്യ സെക്രട്ടറി രാജേഷ് ഭൂഷന്‍ സംസ്ഥാനങ്ങള്‍ക്കും കേന്ദ്രഭരണ പ്രദേശങ്ങള്‍ക്കും കത്തയച്ചു.
കുരങ്ങുപനിയുടെ ലക്ഷണങ്ങളെക്കുറിച്ചു ഡോക്ടര്‍മാര്‍ക്കും ആരോഗ്യപ്രവര്‍ത്തകര്‍ക്കും അവബോധം വേണമെന്നു കത്തില്‍ പറയുന്നു. രോഗമുണ്ടെന്നു സംശയിക്കുന്ന സാഹചര്യങ്ങളില്‍ കര്‍ശന പരിശോധന വേണമെന്നും കത്തില്‍ നിര്‍ദേശമുണ്ട്.
യുഎഇയില്‍നിന്നെത്തിയ ആളാണ് സംസ്ഥാനത്തു കുരങ്ങ് പനിയെന്ന സംശയത്തെത്തുടര്‍ന്ന് നിരീക്ഷണത്തില്‍ കഴിയുന്നത്. ഇദ്ദേഹത്തിന്‍റെ പരിശോധനഫലം ഇന്നു വൈകിട്ടു ലഭിക്കും.
പനിയും ശരീരത്തിലുണ്ടാകുന്ന പൊള്ളലുമാണ് കുരങ്ങ് പനിയുടെ ലക്ഷണം. രോഗം മനുഷ്യരില്‍ നിന്നു മനുഷ്യരിലേക്കു പടരും.