ദിവസങ്ങളായി സംസ്ഥാനത്ത് ശക്തമായി തുടരുന്ന കാലവർഷം വെള്ളിയാഴ്ചയോടെ ദുർബലമാകുമെന്ന് കാലാവസ്ഥാ നിരീക്ഷണ കേന്ദ്രം. ഇന്ന് സംസ്ഥാനത്ത് മഴ കുറയുമെങ്കിലും നാളെയും മറ്റന്നാളും അതിശക്തമായ മഴയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.
തെക്കൻ ഗുജറാത്ത് തീരം മുതൽ വടക്കൻ കേരളം വരെ സജീവമായി തുടരുന്ന ന്യൂനമർദ പാത്തിയാണ് കാലവർഷം ശക്തിപ്പെടാൻ ഇടയാക്കിയത്. എന്നാൽ, വെള്ളിയാഴ്ചയോടെ ഇതു ദുർബലമാകുമെന്നാണ് നിലവിലെ നിഗമനം.
ഇന്ന് വടക്കൻ കേരളത്തിൽ അതിശക്തമായ മഴയ്ക്ക് സാധ്യതയുണ്ട്. എന്നാൽ, തെക്കൻ കേരളത്തിലും മധ്യകേരളത്തിലും മഴ കുറയും. ആറ് ജില്ലകളിൽ ഇന്ന് യെല്ലോ അലർട്ട് പ്രഖ്യാപിച്ചു. തൃശൂർ, മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ് ജില്ലകളിലാണ് യെല്ലോ അലർട്ട് പ്രഖ്യാപിച്ചത്.