കണ്ണൂർ: സംരക്ഷിത വനങ്ങൾക്കും വന്യജീവി സങ്കേതങ്ങൾക്കും ദേശീയ പാർക്കുകൾക്കും ചുറ്റും ഒരു കിലോമീറ്റർ ദൂരം ബഫർസോൺ നിർണയിച്ച് പരിസ്ഥിതിലോല മേഖലയാക്കണമെന്ന സുപ്രീം കോടതിവിധി പതിനായിരക്കണക്കിന് കർഷകരെ കുടിയിറക്കുന്നതിന് തുല്യമാകുമെന്ന് കർഷക കോൺഗ്രസ് ജില്ലാ കമ്മിറ്റി അഭിപ്രായപ്പെട്ടു.
പരിസ്ഥിതിലോല പ്രദേശം എന്നത് വനത്തിനുള്ളിൽത്തന്നെ നിജപ്പെടുത്തണം. 100 മീറ്റർ പരിധി സീറോയാക്കാൻ ശിപാർശ നൽകിയിടത്ത് പുതിയ വിധി എങ്ങനെ വന്നുവെന്ന് പഠിക്കേണ്ടിയിരിക്കുന്നു. ഇക്കാര്യത്തിൽ കോടതിയെ കാര്യങ്ങൾ ധരിപ്പിച്ച കേന്ദ്രസർക്കാരിനും സംസ്ഥാനസർക്കാരിനും എന്തുപറ്റിയെന്ന ആശങ്ക കർഷകർക്കുണ്ട്. അതുകൊണ്ട് കർഷക താത്പര്യം മുന്നിൽക്കണ്ട് കേന്ദ്ര- സംസ്ഥാന സർക്കാരുകൾ സുപ്രീം കോടതിയിൽ അപ്പീൽ നൽകാൻ തയാറാകണമെന്നും യോഗംആവശ്യപ്പെട്ടു. ജില്ലാ പ്രസിഡന്റ് ജോസ് പൂമല അധ്യക്ഷത വഹിച്ചു. സംസ്ഥാന ജനറൽ സെക്രട്ടറിമാരായ കെ.സി. വിജയൻ, എ.ഡി. സാബൂസ്, ടി.ഒ. മാത്യു, പി.ഒ. ചന്ദ്രമോഹനൻ, എ. ജയറാം, ജോസ് പറയങ്കുഴി, ടോണി ജോസഫ്, സതീശൻ തലശേരി എന്നിവർ പ്രസംഗിച്ചു.