കന്നുകാലികളെ തിരിച്ചറിയുന്നതിനായി മൈക്രോചിപ്പ് ടാഗിംഗ് സംവിധാനം. ഇതില് രേഖപ്പെടുത്തിയിട്ടുള്ള 15 അക്ക നമ്പറിന്റെ അടിസ്ഥാനത്തില് കന്നുകാലികളെ തിരിച്ചറിയുന്നതിനുള്ള പുതിയ സംവിധാനത്തിന് ഇന്നു പത്തനംതിട്ടയില് തുടക്കം കുറിക്കും. മൃഗസംരക്ഷണ വകുപ്പാണ് പദ്ധതി നടപ്പാക്കുന്നത്. നിലവില് കന്നുകാലികളെ തിരിച്ചറിയാനും ഇന്ഷ്വറന്സ്, വായ്പ, ചികിത്സ ആവശ്യങ്ങള്ക്കുമായി പ്ലാസ്റ്റിക് ടാഗുകളാണ് ഉപയോഗിക്കുന്നത്. ഇതിനു പകരമായി നടപ്പാക്കാന് പോകുന്ന പുതിയ തിരിച്ചറിയല് സംവിധാനമാണ്
റേഡിയോ ഫ്രീക്വന്സി ഐഡന്റിഫിക്കേഷന് (ആര്എഫ്ഐഡി) മൈക്രോചിപ്പിംഗ്.
12 മില്ലിമീറ്റര് നീളവും രണ്ട് മില്ലിമീറ്റര് വ്യാസവും ഉള്ള ബയോകോംപാറ്റബിള് ഗ്ലാസുകൊണ്ട് നിര്മിച്ചിരിക്കുന്ന മൈക്രോചിപ് മൃഗങ്ങളുടെ തൊലിക്കടിയില് നിക്ഷേപിക്കും. ഒരു ദിവസം പ്രായമായ മൃഗങ്ങളിലും ഇതു ഘടിപ്പിക്കാമെന്ന് മൃഗസംരക്ഷണവകുപ്പ് അവകാശപ്പെട്ടു. ഇതില് രേഖപ്പെടുത്തിയിട്ടുള്ള 15 അക്ക തിരിച്ചറിയല് നമ്പര് മനസിലാക്കാന് പ്രത്യേക മൈക്രോചിപ് റീഡര് ഉപയോഗിക്കും. പുതുതായി ആവിഷ്കരിക്കുന്ന സോഫ്റ്റ്വെയര് ആപ്ലിക്കേഷന് വഴി ‘ഇ-സമൃദ്ധ’ സോഫ്റ്റ്വെയറില് നമ്പര് എത്തുകയും വിവരങ്ങള് കര്ഷകര്ക്കും സാങ്കേതിക ഉദ്യോഗസ്ഥര്ക്കും ലഭ്യമാകുകയും ചെയ്യും. കന്നുകാലിയെ സംബന്ധിക്കുന്ന പൂര്ണ വിവരങ്ങള് ചിപ്പില് ഉള്ളടക്കം ചെയ്തിരിക്കും.
സംസ്ഥാനത്തുടനീളമുള്ള കൃഷിക്കാരുടെയും അവരുടെ മൃഗങ്ങളുടെയും വിവരങ്ങള് ശേഖരിക്കുന്നതിനും ഓരോ മൃഗത്തെയും തിരിച്ചറിയുന്നതിനുമായാണ് ‘ഇ-സമൃദ്ധ’ പദ്ധതി നടപ്പാക്കാന് മൃഗസംരക്ഷണ വകുപ്പ് തീരുമാനിച്ചത്. സംസ്ഥാനത്ത് ആദ്യമായി പത്തനംതിട്ട ജില്ലയിലാണ് പദ്ധതി നടപ്പാക്കുന്നത്. ഇതിനായി 7.52 കോടി രൂപ കേരള പുനര്നിര്മാണ പദ്ധതിയിലൂടെ സര്ക്കാര് അനുവദിച്ചിട്ടുണ്ട്. ഇന്ത്യയിലാദ്യമായാണ് ഇത്തരത്തില് ഒരു സമഗ്രമായ ഡിജിറ്റല് സംവിധാനം മൃഗസംരക്ഷണമേഖലയില് ഒരു സര്ക്കാര് വകുപ്പ് നടപ്പാക്കുന്നത്. പദ്ധതിയുടെ ഉദ്ഘാടനം ഇന്ന് മന്ത്രി ജെ. ചിഞ്ചുറാണി പത്തനംതിട്ടയിലെ ഓമല്ലൂരില് നിര്വഹിക്കും.