ഇരിട്ടി: ഗ്രാമീണ മേഖലയിലെ മുഴുവൻ വീടുകളിലും 2024 മാർച്ചോടെ ശുദ്ധജലം ടാപ്പിലൂടെ എത്തിക്കുന്നതിനുള്ള കേന്ദ്ര-സംസ്ഥാന സംയുക്ത പദ്ധതിയായ ജൽ ജീവൻ മിഷന് പായം പഞ്ചായത്തിൽ തുടക്കമായി. പദ്ധതിയുമായി ബന്ധപ്പെട്ട് പഞ്ചായത്ത് ജനപ്രതിനിധികൾക്കുള്ള ശില്പശാല ഗ്രാമപഞ്ചായത്ത് പ്രസിഡൻറ് പി. രജനി ഉദ്ഘാടനം ചെയ്തു. പഞ്ചായത്തിലെ ജൽ ജീവൻ മിഷൻ പ്രവർത്തനങ്ങളുടെ നിർവ്വഹണ സഹായ ഏജൻസി ജീവൻ ജ്യോതി – കൽപ്പറ്റ എന്ന സംഘടനയാണ്. പദ്ധതി വിഹിതം 50 ശതമാനം കേന്ദ്രവും, 25 ശതമാനം സംസ്ഥാനവും, 15 ശതമാനം പഞ്ചായത്തും, 10 ശതമാനം ഗുണഭേക്തൃ വിഹിതവുമായിട്ടാണ് കേന്ദ്ര-സംസ്ഥാന സർക്കാരുകൾ പദ്ധതിക്കായി പ്ലാൻ ചെയ്തിട്ടുള്ളത്. പഞ്ചായത്തിലെ മുഴുവൻ കുടുംബാംഗങ്ങളിലും ഗാർഹിക കണക്ഷനുകളാണ് ലഭ്യമാക്കുക.
ശിൽപ്പശാലയിൽ പഞ്ചായത്ത് സെക്രട്ടറി ടി. ഡി. തോമസ് അധ്യക്ഷനായി. ഐ എസ് എ എക്സിക്യൂട്ടീവ് ഡയറക്ടർ പി.എം. പത്രോസ് ജലജീവൻ മിഷൻ പ്രവർത്തനങ്ങളെക്കുറിച്ച് വിവരിച്ചു. പദ്ധതിയുടെ നടത്തിപ്പ്, സാങ്കേതികവശങ്ങൾ എന്നീ വിഷയങ്ങളിൽ ടീം ലീഡർമാരായ ആതിര ഗോപൻ, ശാമിലി ശശി എന്നിവർ ക്ലാസ്സുകൾ നയിച്ചു. ജൽ ജീവൻ മിഷൻ പ്രവർത്തനങ്ങളുടെ നടത്തിപ്പിനും ഏകോപനത്തിനുവേണ്ടി പഞ്ചായത്തിൽ ജൽ ജീവൻ മിഷൻ്റെ ഓഫീസ് ഉദ്ഘാടനവും പഞ്ചായത്ത് പ്രസിഡൻറ് പി. രജനി ഉദ്ഘാടനം ചെയ്തു. എല്ലാ ജനപ്രതിനിധികളും ശിൽപ്പശാലയിലും ഉദ്ഘാടന ചടങ്ങിലും പങ്കെടുത്തു.
പായം ഗ്രാമപഞ്ചായത്തിൽ ജൽ ജീവൻ മിഷൻ പദ്ധതിയ്ക്ക് തുടക്കം.
