സംസ്ഥാനത്ത് ഇനി 5ജി തരംഗത്തിന്റെ നാളുകള്. 5ജി നെറ്റ്വര്ക്ക് സംവിധാനം ശക്തിപ്പെടുത്തുന്നതിന് ഉന്നതതല സമിതി രൂപീകരിക്കുമെന്ന് ധനമന്ത്രി കെ.എന്. ബാലഗോപാല്. ഡിജിറ്റല് വിപുലീകരണത്തിന്റെ ഭാഗമായി 5 ജി ലീഡര്ഷിപ്പ് പാക്കേജ് നടപ്പാക്കും. 2022 കേന്ദ്ര ബജറ്റിലും 5ജി നെറ്റുവര്ക്കുകള് മെച്ചപ്പെടുത്തുമെന്ന് പ്രഖ്യാപിച്ചിട്ടുണ്ട്.
5 ജി സംവിധാനം സംസ്ഥാനത്ത് കൊണ്ടുവരുന്നതിനും സേവന രംഗത്ത് മുന്നിലെത്തുന്നതിനും നടപടികള് സ്വീകരിക്കും. 5 ജി വിപ്ലവത്തിന്റെ മുന്നിരയിലെത്തുന്നതിനുള്ള സവിശേഷ ഘടകങ്ങള് സംസ്ഥാനത്തുണ്ടെന്നും മന്ത്രി പറഞ്ഞു. ആഗോളതലത്തില് നടക്കുന്ന 5ജി വിപ്ലവത്തില് രാജ്യത്തെ കേരളത്തെ മുന്നിരയിലെത്തിക്കുകയെന്നതാണ് സര്ക്കാര് ലക്ഷ്യമിടുന്നത്. ഇതിനായി കെ ഫോണ് സംവിധാനം ശക്തിപ്പെടുത്തും.
തിരുവനന്തപുരം- കൊല്ലം, എറണാകുളം- കൊരട്ടി, എറണാകുളം- ചേര്ത്തല, കോഴിക്കോട്- കണ്ണൂര് തുടങ്ങിയ വിപുലീകൃത ഐടി ഇടനാഴികളിലാണ് 5 ജി ലീഡര്ഷിപ്പ് പാക്കേജ് ആദ്യം ആരംഭിക്കുകയെന്നും മന്ത്രി പറഞ്ഞു.