എതെങ്കിലും തരത്തിലുള്ള വിവാദങ്ങള്‍ ഉയരുന്നു എന്നതിനാല്‍ വികസന പദ്ധതികള്‍ മാറ്റിവയ്ക്കാന്‍ സര്‍ക്കാര്‍ തയാറല്ലെന്ന് മുഖ്യമന്ത്രി പിണറായി വിജയന്‍. കൊച്ചിൻ ഇന്‍റർനാഷണൽ എയർപോർട്ട് ലിമിറ്റഡ് (സിയാൽ) പയ്യന്നൂരിന് സമീപത്തെ ഏറ്റുകുടുക്കയില്‍ സ്ഥാപിച്ച സൗരോര്‍ജ പ്ലാന്‍റ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ചില വികസന പ്രവര്‍ത്തനങ്ങള്‍ നടക്കും എന്നതുകൊണ്ട് അതിപ്പോള്‍ നടപ്പാക്കേണ്ട എന്നു ചിന്തിക്കുന്നവരുണ്ട്. ഇത്തരം വിവാദങ്ങള്‍കൊണ്ട് വികസന പ്രവര്‍ത്തനങ്ങള്‍ക്ക് തടയിടാനാകില്ല. ഇത് നമുക്കും വരുംതലമുറകള്‍ക്കുമുള്ള പദ്ധതികളാണ്.
നമ്മുടെ പരിസ്ഥിതിക്കിണങ്ങും വിധത്തിലുള്ള പദ്ധതികളാണ് ഇവിടെ നടപ്പാക്കുന്നത്. സര്‍ക്കാരിന്‍റെ വികസന കാഴ്ചപ്പാടിന് കൂടുതല്‍ കരുത്തേകുകയാണ് സിയാല്‍ ചെയ്തതതെന്നും സിയാല്‍ ചെയര്‍മാന്‍കൂടിയായ അദ്ദേഹം പറഞ്ഞു. ചീമേനിയില്‍ സോളാര്‍ പ്ലാന്‍റ് സ്ഥാപിക്കാന്‍ നേരത്തേ തീരുമാനിച്ചിരുന്നതാണ്. എന്നാല്‍ പദ്ധതിയെപ്പറ്റി കൂടുതലായി അറിയുന്നതിലുള്ള കാലതാമസമാണ് തടസമായത്. ഇത്തരം പദ്ധതികള്‍ കൂടുതലായി നടപ്പാക്കേണ്ടതുണ്ടെന്നും അദ്ദേഹം പറഞ്ഞു.
ഭൂമിയുടെ ഘടനയെ കൃത്യതയോടെ ഉപയോഗിക്കുന്നതിനാല്‍ മറ്റുസ്ഥലങ്ങളിലെ പ്ലാന്‍റുകളെക്കാള്‍ 35 ശതമാനത്തിലധികം പാനലുകളെ ഉള്‍ക്കൊള്ളാന്‍ കഴിയും.
പയ്യന്നൂര്‍ പ്ലാന്‍റില്‍ നിന്ന് മാത്രം പ്രതിദിനം 48,000 യൂണിറ്റ് വൈദ്യുതി ലഭിക്കും. സോളാര്‍ കാര്‍ പോര്‍ട്ട് ഉള്‍പ്പെടെ കൊച്ചി വിമാനത്താവള പരിസരത്തുള്ള എട്ടു സൗരോര്‍ജ പ്ലാന്‍റുകള്‍ നിലവില്‍ സിയാലിന്‍റെ സൗരോര്‍ജ പദ്ധതിയുടെ ഭാഗമാണ്. പയ്യന്നൂര്‍ പ്ലാന്‍റ് പ്രവര്‍ത്തനക്ഷമമാകുന്നതോടെ സിയാലിന്‍റെ സോളാര്‍ പ്ലാന്‍റുകളുടെ സ്ഥാപിതശേഷി 50 മെഗാവാട്ട് ആയി വര്‍ധിച്ചു. ഇവയിലൂടെ പ്രതിദിനം രണ്ട് ലക്ഷത്തിലധികം യൂണിറ്റ് വൈദ്യുതിയാണ് സിയാലിന് ലഭിക്കുന്നത്.
ഊര്‍ജ സ്വയംപര്യാപ്തതയുള്ള സ്ഥാപനം എന്നതിലപ്പുറം ഊര്‍ജോത്പാദകരായി സിയാല്‍ മാറുകയാണ്. വിമാനത്താവള പരിസരത്തുള്ള പ്ലാന്‍റുകളും ഏറ്റുകുടുക്ക സൗരോര്‍ജ നിലയവും ഉത്പാദിപ്പിക്കുന്ന അധിക വൈദ്യുതി കേരള സ്റ്റേറ്റ് ഇലക്ട്രിസിറ്റി ബോര്‍ഡിന്‍റെ പവര്‍ ഗ്രിഡിലേക്ക് നല്‍കുകയും ആവശ്യമുള്ളപ്പോള്‍ തിരിച്ചു ലഭിക്കുകയും ചെയ്യുന്ന പവര്‍ ബാങ്കിംഗ് സമ്പ്രദായമാണ് സിയാല്‍ നടപ്പിലാക്കുന്നത്. വൈദ്യുതി വകുപ്പുമന്ത്രി കെ. കൃഷ്ണന്‍ കുട്ടി അധ്യക്ഷത വഹിച്ചു.
മന്ത്രി എം.വി. ഗോവിന്ദന്‍, ടി.ഐ. മധുസൂദനന്‍ എംഎല്‍എ, എം. രാജഗോപാലന്‍ എംഎല്‍എ എന്നിവര്‍ വിശിഷ്ടാതിഥികളായിരുന്നു.
ജില്ലാ പഞ്ചായത്ത് പ്രസിഡന്‍റ് പി.പി. ദിവ്യ, പയ്യന്നൂര്‍ ബ്ലോക്ക് പഞ്ചായത്ത് പ്രസിഡന്‍റ് പി.വി. വത്സല, കാങ്കോല്‍-ആലപ്പടമ്പ പഞ്ചായത്ത് പ്രസിഡന്‍റ് എം.വി. സുനില്‍ കുമാര്‍, ചീമേനി പഞ്ചായത്ത് പ്രസിഡന്‍റ് കെ.പി. വത്സലന്‍, ജില്ലാ പഞ്ചായത്തംഗം എം. രാഘവന്‍, സിയാല്‍ എംഡി എസ്. സുഹാസ്, എക്‌സിക്യൂട്ടീവ് ഡയറക്ടര്‍ പി. ജോസ് തോമസ് എന്നിവര്‍ ഉദ്ഘാടന ചടങ്ങില്‍ പങ്കെടുത്തു.