“വിനാശകരമായ കെ-റയിൽ വേണ്ട, കേരളം വേണം’ എന്ന മുദ്രാവാക്യമുയർത്തി സംസ്ഥാന കെ-റെയിൽ സിൽവർ ലൈൻ വിരുദ്ധ ജനകീയ സമിതി കാസർഗോഡുനിന്ന് ആരംഭിക്കുന്ന സമരജാഥയ്ക്ക് തുടക്കമായി.
കാസർഗോഡ് പുതിയ ബസ്‌സ്റ്റാൻഡിൽ നടന്ന ചടങ്ങിൽ സമരജാഥയുടെ ഉദ്ഘാടനം പ്രതിപക്ഷ നേതാവ് വി.ഡി. സതീശൻ നിർവഹിച്ചു. കേരളത്തെ രക്ഷിക്കാനുള്ള ജാഥയാണിതെന്ന് ണെന്ന്കാസർഗോഡ് അദ്ദേഹം പറഞ്ഞു.
കെ-റെയിൽ തയാറാക്കിയ ഡിപിആർ അബദ്ധ പഞ്ചാംഗമാണ്. സാമൂഹ്യ- പാരിസ്ഥിതിക പഠനങ്ങൾ നടത്തിയതിനുശേഷമാണ് ഡിപിആർ തയാറാക്കേണ്ടത്. എന്നാൽ സിൽവർ ലൈനിനുവേണ്ടി ആദ്യം ഡിപിആർ തയാറാക്കുക, പിന്നീട് പഠനം നടത്തുക എന്ന തലതിരിഞ്ഞ രീതിയിലാണ് സർക്കാർ നീങ്ങുന്നതെന്നും അദ്ദേഹം ആരോപിച്ചു. 329 കിലോമീറ്റർ ദൂരത്തിൽ എംബാങ്ക്മെന്‍റും 200 കിലോമീറ്റർ ദൂരത്തിൽ മതിലും കെട്ടിയാൽ കേരളത്തിലെ ജനങ്ങൾ എങ്ങനെ സഞ്ചരിക്കും? ഇത് വേഗത്തിൽ ജനങ്ങളുടെ സഞ്ചാരസ്വാതന്ത്ര്യം ഇല്ലാതാക്കാനുള്ള പദ്ധതിയാണെന്നും അദ്ദേഹം അഭിപ്രായപ്പെട്ടു.
കേരളം എന്തെന്നറിയാത്ത ഫ്രാൻസിലെ കമ്പനി തയാറാക്കിയ വിശദ പദ്ധതിരേഖ അടിസ്ഥാനമാക്കി കെ-റെയിൽ നിർമിച്ചാൽ കേരളം ബാക്കിയുണ്ടാകില്ല. സംസ്ഥാന സമരജാഥ 24 ന് തിരുവനന്തപുരത്ത് സെക്രട്ടേറിയറ്റ് നടയിൽ എത്തുമ്പോൾ ആയിരങ്ങൾ അണിനിരക്കുന്ന മഹാസംഗമമായി മാറുമെന്നും അദ്ദേഹം പറഞ്ഞു. സമരജാഥയുടെ പതാക വി.ഡി. സതീശനിൽനിന്ന് ജാഥാ ക്യാപ്റ്റൻ എം.പി. ബാബുരാജ് ഏറ്റുവാങ്ങി.
ചടങ്ങിൽ സമിതി സംസ്ഥാന ചെയർമാൻ എം.പി. ബാബുരാജ് അധ്യക്ഷത വഹിച്ചു. ജനറൽ കൺവീനർ എസ്. രാജീവൻ, ജാഥാ മാനേജർ ടി.ടി. ഇസ്മയിൽ, രാജ്മോഹൻ ഉണ്ണിത്താൻ എംപി, മുൻ എംഎൽഎമാരാ‍യ എം.സി. കമറുദ്ദീൻ, ജോസഫ് എം. പുതുശേരി, കെ.പി. കുഞ്ഞിക്കണ്ണൻ, എൻഎപിഎം ദേശീയ കൺവീനർ സഞ്ജയ് മംഗള ഗോപാൽ, സി.ആർ. നീലകണ്ഠൻ, അമ്പലത്തറ കുഞ്ഞിക്കൃഷ്ണൻ, ടി.വി. രാജേന്ദ്രൻ, വി.കെ. രവീന്ദ്രൻ, ഡിസിസി പ്രസിഡന്‍റ് പി.കെ. ഫൈസൽ, ജോൺ ജോസഫ്, ജോൺ പെരുവന്താനം, പ്രഫ. കുസുമം ജോസഫ്, അസീസ് മരിക്കെ, സി.എ. യൂസഫ്, കെ.കെ. സുരേന്ദ്രൻ, ഷൈല കെ. ജോൺ, ഹനീഫ് നെല്ലിക്കുന്ന്, ബദറുദീൻ മാടായി, മിനി കെ. ഫിലിപ്പ്, അബ്ദുൾഖാദർ ചട്ടഞ്ചാൽ, ശരണ്യ രാജ്, സി.എം. അഷ്റഫ് എന്നിവർ പ്രസംഗിച്ചു.
ഇന്നു രാവിലെ ഒന്പതിന് ഉദുമ പാലക്കുന്നിൽനിന്ന് പ്രയാണമാരംഭിക്കുന്ന ജാഥ കാഞ്ഞങ്ങാട്, നീലേശ്വരം, തൃക്കരിപ്പൂർ എന്നിവിടങ്ങളിലെ സ്വീകരണ യോഗങ്ങൾക്കുശേഷം വൈകുന്നേരം അഞ്ചിന് പയ്യന്നൂരിൽ സമാപിക്കും.