പൊതുവിതരണ സംവിധാനത്തിലെ എല്ലാ സേവനവും ഓൺലൈനാക്കുമെന്ന്‌ ഭക്ഷ്യമന്ത്രി ജി ആർ അനിൽ പറഞ്ഞു. തിരുവനന്തപുരം താലൂക്ക് സപ്ലൈ ഓഫീസ് കെട്ടിടം ഉദ്‌ഘാടനം ചെയ്യുകയായിരുന്നു അദ്ദേഹം.
സർക്കാരിന്റെ ഒന്നാം വാർഷികത്തോടനുബന്ധിച്ച് സേവനങ്ങളെല്ലാം ഓൺലൈനായി ഉപഭോക്താക്കൾക്ക് ലഭ്യമാകും. വകുപ്പിന് കീഴിലെ എല്ലാ ഓഫീസും ഈ സർക്കാരിന്റെ കാലത്തുതന്നെ സ്വന്തം കെട്ടിടങ്ങളിലേക്ക് മാറ്റും. കാർഡുടമകൾക്ക് ആവശ്യങ്ങളും പരാതികളും ഓൺലൈനായി നൽകാൻ എല്ലാ സപ്ലൈ ഓഫീസിലും ഇ-–-ഓഫീസ് സംവിധാനം ഏർപ്പെടുത്തും. ഓരോ പ്രദേശത്തും കൂടുതൽ കവറേജുള്ള സിമ്മുപയോഗിച്ച് ഇ––പോസ് മെഷീനിലെ നെറ്റ്‌വർക്ക് തകരാറുകൾക്ക് ശാശ്വതപരിഹാരം കണ്ടെത്തുമെന്നും മന്ത്രി പറഞ്ഞു.