കണ്ണൂർ: കണ്ണൂർ സിറ്റി റോഡ് ഇംപ്രൂവ്‌മെൻറ് പദ്ധതിയുടെ പുരോഗതി എംഎൽഎമാരുടെ നേതൃത്വത്തിൽ അവലോകനം ചെയ്തു. ജില്ലാ കളക്ടർ എസ്. ചന്ദ്രശേഖറിന്‍റെ അധ്യക്ഷത വഹിച്ചു.എംഎൽഎമാരായ കടന്നപ്പള്ളി രാമചന്ദ്രൻ , കെ.വി. സുമേഷ് എന്നിവർ പങ്കെടുത്തു.
നടപടിക്രമങ്ങൾ സമയബന്ധിതമായി പൂർത്തിയാക്കാൻ എംഎൽഎമാർ നിർദേശം നൽകി. പദ്ധതിയൽ വാഹന ഗതാഗതത്തിന് പുറമെ കാൽനട യാത്രക്കാർക്ക് പ്രത്യേക പരിഗണന ലഭിക്കും. കൂടാതെ ട്രാഫിക് ലൈറ്റ് സംവിധാനങ്ങളും ഡ്രെയിനേജ്, ട്രാഫിക് ജംഗ്ഷന് പ്രത്യേക ഡിസൈൻ, യൂട്ടിലിറ്റി സർവീസ് തുടങ്ങിയ സംവിധാനങ്ങളും ഏർപ്പെടുത്തും. യോഗത്തിൽ എഡിഎം കെ.കെ. ദിവാകരൻ, ഡെപ്യൂട്ടി കളക്ടർ (എൽഎ) ടി.വി. രഞ്ജിത്ത്, കെആർഎഫ്ബി ജനറൽ മാനേജർ സതീഷ് കുമാർ, പ്രോജക്ട് കോ -ഓർഡിനേറ്റർ സി .ദേവേശൻ തുടങ്ങിയവർ പങ്കെടുത്തു.