പരിയാരം: കോവിഡ് മൂന്നാംതരംഗ വ്യാപന സാഹചര്യത്തില്‍ കണ്ണൂര്‍ ഗവ. മെഡിക്കല്‍ കോളജ് ആശുപത്രിയില്‍ സന്ദര്‍ശകര്‍ക്ക് നിയന്ത്രണം കര്‍ശനമാക്കി. 24 മുതല്‍ ഒപി രജിസ്ട്രേഷന്‍ സമയം രാവിലെ എട്ടു മുതല്‍ 11 വരെ ആയിരിക്കും. പ്രത്യേക ഫീവര്‍ ക്ലിനിക്ക് രണ്ടാം നിലയില്‍ പ്രവര്‍ത്തിക്കുന്നതിനാല്‍ പനി ലക്ഷണമുള്ളവര്‍ ഈ ക്ലിനിക്കില്‍ ചികിത്സ തേടേണ്ടതാണ്.
മെഡിക്കല്‍ കോളജിലും ആശുപത്രിയിലും എത്തുന്നവര്‍ എന്‍-95 അല്ലെങ്കില്‍ ഡബ്ള്‍ മാസ്‌ക് ധരിക്കേണ്ടതാണ്. കോവിഡ് വർധിക്കുന്ന സാഹചര്യത്തിൽ വാര്‍ഡുകളുടെ എണ്ണം വര്‍ധിപ്പിച്ചതായും കോവിഡേതര വിഭാഗത്തിലെ അടിയന്തരമല്ലാത്ത ശസ്ത്രക്രിയകൾ തത്കാലത്തേക്ക് മാറ്റിവച്ചതായും പ്രിന്‍സിപ്പൽ ഡോ. കെ. അജയകുമാറും ആശുപത്രി സൂപ്രണ്ട് ഡോ. കെ. സുദീപും അറിയിച്ചു.