കണ്ണൂർ: തീരദേശ റോഡുകളുടെ നവീകരണ പദ്ധതിപ്രകാരം ഹാർബർ എൻജിനിയറിംഗ് വകുപ്പ് പൂർത്തീകരിച്ച കണ്ണൂർ ജില്ലയിലെ 30 റോഡുകൾ ഉൾപ്പെടെ സംസ്ഥാനത്തെ 112 റോഡുകളുടെ ഉദ്ഘാടനം മന്ത്രി സജി ചെറിയാൻ ഓൺലൈനായി നിർവഹിച്ചു. 13.27 കോടി രൂപ ചെലവിൽ 27.72 കിലോമീറ്റർ റോഡാണ് പൂർത്തിയാക്കിയത്. തീരദേശമേഖലയിലെ പശ്ചാത്തലവികസനം നടപ്പിലാക്കുന്നതിന്‍റെ ഭാഗമായി അടുത്ത അഞ്ചു വർഷംകൊണ്ട് ബഹുഭൂരിപക്ഷം തീരദേശറോഡുകളുടെയും വികസനം യാഥാർഥ്യമാക്കുമെന്ന് മന്ത്രി പറഞ്ഞു. 80 കോടി രൂപ ഇതിനായി അനുവദിച്ചിട്ടുണ്ട്. മത്സ്യത്തൊഴിലാളികളുടെ ഇൻഷ്വറൻസ് പരിരക്ഷ ഉറപ്പുവരുത്താനും നഷ്ടപരിഹാരം നൽകാനും നടപടി കൈക്കൊണ്ടതായി മന്ത്രി പറഞ്ഞു. ഇതിനായി പ്രത്യേക അദാലത്തുകൾ നടത്തിയതായും മന്ത്രി പറഞ്ഞു.
ചടങ്ങിൽ രാമചന്ദ്രൻ കടന്നപ്പള്ളി എംഎൽഎ അധ്യക്ഷത വഹിച്ചു. മേയർ ടി.ഒ. മോഹനൻ മുഖ്യാതിഥിയായിരുന്നു.