പഞ്ചാബില്‍ പ്രധാനമന്ത്രി നരേന്ദ്ര മോദിയുടെ സുരക്ഷയില്‍ വീഴ്ചയുണ്ടായ സംഭവത്തില്‍ സുപ്രീംകോടതിയില്‍ ഹര്‍ജി. സംഭവത്തെക്കുറിച്ച് അന്വേഷിക്കണമെന്നാണ് ഹര്‍ജിയിലെ ആവശ്യം.
വിഷയം ഗൗരവമുള്ളതാണെന്ന് ചീഫ് ജസ്റ്റീസ് എന്‍.വി. രമണ നിരീക്ഷിച്ചു. പഞ്ചാബ് സര്‍ക്കാരിന് ഹര്‍ജിയുടെ പകര്‍പ്പ് നല്‍കാനും കോടതി നിര്‍ദേശിച്ചു. ഹര്‍ജി വെള്ളിയാഴ്ച പരിഗണിക്കും.
അതേസമയം, സുരക്ഷാവീഴ്ചയുണ്ടായ സംഭവത്തില്‍ അന്വേഷണത്തിന് ഉന്നതതല സമിതിയെ പഞ്ചാബ് സര്‍ക്കാര്‍ നിയോഗിച്ചു. ജസ്റ്റിസ് എം.എസ്. ഗില്‍ ആണ് സമിതി അധ്യക്ഷന്‍.
പഞ്ചാബില്‍ തെരഞ്ഞെടുപ്പ് പ്രചരണത്തിന് എത്തിയപ്പോഴാണ് പ്രധാനമന്ത്രിയെ കര്‍ഷകസംഘടനകള്‍ വഴിയില്‍ തടഞ്ഞത്. ഇതേതുടര്‍ന്ന് ബതിന്ദയിലെ മേല്‍പ്പാലത്തില്‍ പ്രധാനമന്ത്രിയുടെ വാഹനവ്യൂഹം 20 മിനിട്ടോളം കുടുങ്ങി.
ഹുസൈനിവാലയിലെ ദേശീയ രക്തസാക്ഷി സ്മാരകം സന്ദർശിക്കുന്നതിനാണ് പ്രധാനമന്ത്രി ബതിന്ദ വിമാനത്താവളത്തിൽ എത്തിയത്. ഹെലികോപ്റ്ററിലാണ് അദ്ദേഹത്തെ വേദിയിലേക്ക് കൊണ്ടുപോകേണ്ടിയിരുന്നത്. എന്നാൽ കാലാവസ്ഥ മോശമായതിനാൽ പിന്നീട് റോഡ് മാർഗം രക്തസാക്ഷി സ്മാരകം സന്ദർശിക്കാൻ തീരുമാനിച്ചു.
പഞ്ചാബ് പോലീസിന്‍റെ ആവശ്യമായ സുരക്ഷാ ക്രമീകരണങ്ങൾ സ്ഥിരീകരിച്ചതിന് ശേഷമാണ് പ്രധാനമന്ത്രിയുടെ വാഹനവ്യൂഹം റോഡ് മാർഗം യാത്ര തിരിച്ചത്. എന്നാൽ സ്മാരകത്തിന് 30 കിലോമീറ്റർ അകലെ പ്രധാനമന്ത്രിയുടെ വാഹനവ്യൂഹം ഒരു മേൽ‌പ്പാലത്തിൽ എത്തിയപ്പോൾ പ്രതിഷേധക്കാർ തടയുകയായിരുന്നു.
പഞ്ചാബ് സർക്കാർ പ്രധാനമന്ത്രിക്ക് സുരക്ഷ ഒരുക്കിയില്ലെന്നും കേന്ദ്ര ആഭ്യന്തരമന്ത്രാലയം ആരോപിച്ചു. അതേസമയം, സുരക്ഷാ വീഴ്ചയുണ്ടായിട്ടില്ലെന്ന് പഞ്ചാബ് മുഖ്യമന്ത്രി ചരൺജിത് സിംഗ് ചന്നി വിശദീകരിച്ചു.
കൂടാതെ പഞ്ചാബിൽ സുരക്ഷാവീഴ്ചയുണ്ടായതിൽ സംസ്ഥാന സർക്കാരിനെ പ്രധാനമന്ത്രി പരിഹസിച്ചു. ബഠിംഡാ വിമാനത്താവളത്തിൽ ജീവനോടെ തിരിച്ചെത്തിയതിനു മുഖ്യമന്ത്രിയെ നന്ദി അറിയിക്കണമെന്ന് മോദി പറഞ്ഞു. വിമാനത്താവള ഉദ്യോഗസ്ഥരോടായിരുന്നു പ്രധാനമന്ത്രി പരിഹാസരൂപേണ ഇക്കാര്യം പറഞ്ഞത്