രാജ്യത്ത് ഇതുവരെ 25 ഓളം ഒമിക്രോൺ കേസുകൾ സ്ഥിരീകരിച്ചതായി ആരോഗ്യ മന്ത്രാലയം വെള്ളിയാഴ്ച നടത്തിയ വാർത്താസമ്മേളനത്തിൽ അറിയിച്ചു. രാജസ്ഥാനിൽ ഒമ്പത്, ഗുജറാത്തിൽ മൂന്ന്, മഹാരാഷ്ട്രയിൽ 10, കർണാടകയിൽ രണ്ട്, ഡൽഹിയിൽ ഒന്ന് എന്നിങ്ങനെയാണ് കണക്ക്. കണ്ടെത്തിയ എല്ലാ കേസുകളിലും നേരിയ ലക്ഷണങ്ങൾ മാത്രമാണുള്ളത് എന്ന് കേന്ദ്ര ആരോഗ്യ മന്ത്രാലയം ജോയിന്റ് സെക്രട്ടറി ലവ് അഗർവാൾ പറഞ്ഞു.
ഒമൈക്രോൺ ആരോഗ്യസംരക്ഷണ സംവിധാനത്തിന് ഒരു ഭാരമല്ലെങ്കിലും ജാഗ്രത പാലിക്കേണ്ടതുണ്ട് എന്ന് ഇന്ത്യൻ കൗൺസിൽ ഓഫ് മെഡിക്കൽ റിസർച്ച് (ഐസിഎംആർ) ഊന്നിപ്പറഞ്ഞു.കേസുകളുടെ എണ്ണം 25 ആയി ഉയരുമ്പോൾ ഒമിക്‌റോൺ വേരിയന്റ് ഇന്ത്യയിൽ വർദ്ധിച്ചുകൊണ്ടിരിക്കുകയാണെന്ന് അഗർവാൾ പറഞ്ഞു. ആളുകൾ പാർട്ടികളിൽ പങ്കെടുക്കുന്നു, വിവാഹങ്ങൾ സംഘടിപ്പിക്കുന്നു, കോവിഡിന് അനുയോജ്യമായ പെരുമാറ്റം പിന്തുടരേണ്ടതുണ്ടെന്നും അഗർവാൾ പറഞ്ഞു.
കൂടാതെ, ഇന്ത്യയിൽ സാമൂഹിക അകലം പാലിക്കേണ്ടതുണ്ടെന്നും അദ്ദേഹം ചൂണ്ടിക്കാട്ടി. വാക്സിനേഷനുപുറമെ, പൊതുജനാരോഗ്യ നടപടികൾ തുടർച്ചയായി പാലിക്കേണ്ടതുണ്ടെന്ന് ലോകാരോഗ്യ സംഘടന എടുത്തുപറഞ്ഞിട്ടുള്ളതായി അദ്ദേഹം പറഞ്ഞു.മതിയായ മുൻകരുതലുകൾ പാലിക്കേണ്ടതുണ്ട്. പൊതുജനാരോഗ്യ നടപടികളിലെ അലംഭാവം യൂറോപ്പിൽ കോവിഡ് കേസുകളുടെ വർദ്ധനവിന് കാരണമായി എന്ന് അഗർവാൾ പറഞ്ഞു.
ലോകമെമ്പാടുമുള്ള 59 രാജ്യങ്ങളിൽ ഒമിക്രോൺ വകഭേദം റിപ്പോർട്ട് ചെയ്യപ്പെട്ടിട്ടുണ്ട്. യുണൈറ്റഡ് കിംഗ്ഡത്തിൽ 817 കേസുകളും ഡെൻമാർക്കിൽ 786ഉം ഒമിക്രോൺ കേസുകൾ റിപ്പോർട്ട് ചെയ്തു.