കോവിഡ് മൂന്നാം തരംഗം ഉണ്ടായില്ലെങ്കില്‍, പുതിയ വര്‍ഷത്തിലേക്ക് പ്രവേശിക്കും മുന്പുതന്നെ കേരളത്തിലെ ട്രെയിന്‍ സര്‍വീസുകളെല്ലാം കോവിഡിനു മുമ്പുണ്ടായിരുന്ന നിലയിലേക്കു മടങ്ങിവരുമെന്ന് റെയില്‍വേ അധികൃതര്‍. യാത്രാനിരക്കും പഴയപടിയാകും. ഡിസംബര്‍ അവസാനത്തോടെതന്നെ എല്ലാം സാധാരണനിലയിലേക്കു കൊണ്ടുവരാനുള്ള ശ്രമങ്ങളാണ് റെയില്‍വേ നടത്തിവരുന്നത്.
കോവിഡ് നിയന്ത്രണങ്ങള്‍ക്കുശേഷം സര്‍വീസ് പുനരാരംഭിച്ചപ്പോള്‍ ഏര്‍പ്പെടുത്തിയ നിരക്കുവര്‍ധന തുടരുമെന്ന പ്രചാരണം ശരിയല്ല. പഴയ മെമു, പാസഞ്ചറുകളെല്ലാം സര്‍വീസ് പുനരാരംഭിക്കും. ഇപ്പോള്‍ ചിലതു മാത്രമാണ് സര്‍വീസ് നടത്തുന്നത്. സ്‌പെഷല്‍ സര്‍വീസായി ഓടുന്ന ഈ ട്രെയിനുകള്‍ മുമ്പത്തെപ്പോലെയാകും. ഇതിന്‍റെ ഭാഗമായി ട്രെയിനുകളുടെ നമ്പര്‍ മാറ്റുന്ന (സ്‌പെഷല്‍ ട്രെയിനിന് പൂജ്യത്തിലാണ് നമ്പര്‍ തുടങ്ങുന്നത്) നടപടിക്രമങ്ങള്‍ ആരംഭിച്ചുകഴിഞ്ഞു.
അടുത്തയാഴ്ചതന്നെ സ്‌പെഷല്‍ സര്‍വീസുകള്‍ സാധാരണനിലയിലേക്ക് എത്തിക്കും. അതുപോലെതന്നെ ഇപ്പോള്‍ പൂര്‍ണമായും റിസേര്‍വ്ഡ് ആയി ഓടുന്ന ട്രെയിനുകള്‍ പഴയതുപോലെ എക്‌സ്പ്രസുകളുമാകും. എന്നാല്‍ ഇതിന്‍റെ അപ്‌ഡേഷന് അല്പംകൂടി സമയമെടുക്കും. അതുകൂടി കഴിയുന്നതോടെ സീസണ്‍ ടിക്കറ്റുകാരുടെ പ്രശ്‌നങ്ങള്‍ക്ക് പൂര്‍ണ പരിഹാരമാകും.
കോവിഡ്കാലത്ത് റെയില്‍വേയ്ക്കു കോടികളുടെ നഷ്ടം സംഭവിച്ചുവെങ്കിലും യാത്രക്കാരുടെ മേല്‍ അധികചാര്‍ജ് അടിച്ചേല്പിക്കില്ല. പകരം ചരക്കുഗതാഗതത്തിലൂടെ വരുമാനനഷ്ടം നികത്തുമെന്നും അധികൃതര്‍ പറഞ്ഞു.