സംസ്ഥാനത്ത് മൃഗസംരക്ഷണവുമായി ബന്ധപ്പെട്ട് ഹൈക്കോടതി നല്കുന്ന നിര്ദേശങ്ങള് നടപ്പാക്കാന് സര്ക്കാരും മറ്റ് ഏജന്സികളും സ്വീകരിക്കുന്ന നടപടികള് വ്യക്തമാക്കി സംസ്ഥാന മൃഗ ക്ഷേമബോര്ഡ് മാസം തോറും റിപ്പോര്ട്ട് നല്കണമെന്ന് ജസ്റ്റീസ് എ.കെ. ജയശങ്കരന് നമ്പ്യാര്, ജസ്റ്റീസ് പി. ഗോപിനാഥ് എന്നിവരുള്പ്പെട്ട ഡിവിഷന് ബെഞ്ച് നിര്ദേശിച്ചു.
മൃഗക്ഷേമ ബോര്ഡിന്റെ വെബ്സൈറ്റും ജനങ്ങള്ക്ക് പരാതികള് നല്കാനുള്ള ഇ -മെയില് വിലാസവും പ്രസിദ്ധീകരിക്കണം.
തിരുവനന്തപുരത്ത് അടിമലത്തുറയില് ബ്രൂണോയെന്ന നായയെ അടിച്ചുകൊന്നു കടലിലെറിഞ്ഞ സംഭവത്തെത്തുടര്ന്ന് സ്വമേധയാ പരിഗണിക്കുന്ന ഹര്ജിയാണ് ഡിവിഷന് ബെഞ്ചിലുള്ളത്. സംസ്ഥാനത്തെ മൃഗക്ഷേമ ബോര്ഡ് പുനഃസംഘടിപ്പിച്ചെന്ന് സര്ക്കാര് അറിയിച്ചതിനെ തുടര്ന്നാണ് ഡിവിഷന് ബെഞ്ച് ഈ നിര്ദേശം നല്കിയത്. ഹര്ജി 12നു വീണ്ടും പരിഗണിക്കും.