കർണാടകത്തിലേക്ക് കൂടുതൽ കെഎസ്ആർടിസി സർവീസ് നടത്താനും ഗോവയിലേക്കും ഹൈദരാബാദിലേക്കും കർണാടകത്തിൽ നിന്ന് കണക്ഷൻ സർവീസ് ലഭ്യമാക്കാനുമായി കർണാടക ആർടിസിയുമായി കെഎസ്ആർടിസി എംഡി ചർച്ച നടത്തി.
ബംഗളൂരുവിക്കുള്ള ഏറ്റവും ദൈർഘ്യം കുറഞ്ഞ വഴി സുൽത്താൻ ബത്തേരി വഴിയുള്ളതാണ്. കർണാടകയുമായി ചേർന്ന് ഇതുവഴി കൂടുതൽ സർവീസ് നടത്തും. ഹൈദരാബാദ്, ഗോവ എന്നിവിടങ്ങളിലേക്ക് കർണാടക ആർടിസി ബംഗളൂരുവിൽ നിന്ന് സർവീസ് നടത്തുന്നുണ്ട്.
കേരളത്തിൽ നിന്നെത്തുന്ന യാത്രക്കാർക്ക് കർണാടകയുമായി ചേർന്ന് തുടർ യാത്രാ പദ്ധതി നടപ്പാക്കും. ഇതേ മാതൃകയിൽ ടൂറിസം രംഗത്ത് ഹംന്പി, തിരുപ്പതി അടക്കമുള്ള സ്ഥലങ്ങളിലേക്ക് സർവീസ് ആരംഭിക്കും.
ഇതു സംബന്ധിച്ച് കർണാടക ആർടിസി ആസ്ഥാനത്ത് ഗതാഗത സെക്രട്ടറിയും കെഎസ്ആർടിസി സിഎംഡിയുമായ ബിജുപ്രഭാകർ കർണാടക ആർടിസി സിഎംഡി ശിവയോഗിയുമായി കൂടിക്കാഴ്ച നടത്തി. മന്ത്രിതല ചർച്ചയിൽ അന്തിമ തീരുമാനമെടുക്കും.