റോഡ് പണിതു എന്നാൽ റോഡിലേക്ക് കടക്കുന്ന കലുങ്കിൽ സ്ലാബില്ല – പ്രതിഷേധവുമായി ബി ജെ പി

ഇരിട്ടി : റോഡ് കോൺക്രീറ്റ് ചെയ്ത് പുതുക്കി നിർമ്മിച്ചെങ്കിലും റോഡിലേക്ക് കടക്കുന്നതിന് കുറുകെയുള്ള കലുങ്കിന് സ്ലാബിടാതെ കരാറുകാർ മുങ്ങി. ഇതുമൂലം വെള്ളക്കെട്ടും അപകടക്കെണിയും സംജാതമായതോടെ പ്രതിഷേധവുമായി ബി ജെ പി രംഗത്തെത്തി.
കീഴൂർക്കുന്ന് – അയ്യപ്പൻകാവ് റോഡ് നിർമ്മാണത്തിലെ അപാകതക്കും ക്രമക്കേടിനും എതിരെയാണ് ബി ജെ പി കീഴൂർക്കുന്ന് യൂണിറ്റ് പ്രവർത്തകർ രംഗത്തെത്തിയത്.
ഇരിട്ടി നഗരസഭയുടെ 2021 – 22 വർഷ പദ്ധതിയിൽ ഉൾപ്പെടുത്തി 5 ലക്ഷം രൂപ ഉപയോഗിച്ചാണ് റോഡ് കോൺക്രീറ്റ് പ്രവർത്തി പൂർത്തിയാക്കിയത്. എന്നാൽ കീഴൂർ കുന്ന് റോഡിൽ നിന്നും അയ്യപ്പൻ കാവ് റോഡിലേക്ക് കടക്കുന്ന ഇതിന്റെ തുടക്കത്തിൽ റോഡിന് കുറുകെയുള്ള ഭാഗത്തെ കലുങ്കിന് സ്ളാബ് നിർമ്മിക്കാതെ കരാറുകാർ പണി നിർത്തി പോവുകയായിരുന്നു . പ്രവർത്തി തുടങ്ങുമ്പോൾ തന്നെ നാട്ടുകാർ ഇത് കരാറുകാരുടെ ശ്രദ്ധയിൽ കൊണ്ട് വന്നിരുന്നെങ്കിലും ഇവിടെ സ്ലാബിനു പകരം എവിടെനിന്നോ കൊണ്ടുവന്ന ഒരു പഴയ കോൺക്രീറ്റ് ബീമിട്ട് തടിതപ്പുകയായിരുന്നു. ഇതാണ് ഇപ്പോൾ അപകടക്കെണിക്കും വെള്ളക്കെട്ടിനും കാരണമാകുന്നത്. കൂടാതെ 2020 – 21 വർഷത്തെ പദ്ധതിയിൽ പെടുത്തി നവീകരിച്ച കീഴൂർ കുന്ന് – എടക്കാനം റോഡിലും കരാർപ്രകാരമുള്ള പ്രവർത്തി പൂർത്തിയാക്കിയിട്ടില്ല. റോഡിന്റെ വശത്തായി നിർമ്മിച്ച ഓവുചാൽ സ്ലാബിട്ട് മൂടണമെന്നാണ് കരാറിൽ വ്യവസ്ഥ ചെയ്തിരുന്നത്. എന്നാൽ ഈ പ്രവർത്തി പൂർത്തിയാക്കാതെ പൂർത്തിയാക്കിയതായി കാണിച്ച് കരാറുകാരൻ മുഴുവൻ പണവും വാങ്ങി മുങ്ങിയതായും ആരോപണമുണ്ട്. ഇത് സംബന്ധിച്ച് നാട്ടുകാർ ബി ജെ പി യുടെ നേതൃത്വത്തിൽ നഗരസഭാ അധികൃതർക്ക് പരാതി നൽകുകയും ചെയ്തിരുന്നു. എന്നാൽ ഈ പരാതിയിലും യാതൊരു നടപടിയും ഉണ്ടാകാത്ത സാഹചര്യത്തിലാണ് പ്രക്ഷോഭവുമായി ബി ജെ പി രംഗത്തെത്തിയത്. കരാറുകാരും നഗരസഭാ അധികൃതരും തമ്മിലുള്ള അവിശുദ്ധകൂട്ടുകെട്ടാണ് ഇതിനു പിന്നിൽ എന്നാണ് ഇവർ ആരോപിക്കുന്നത്.
തുടർന്നും ഈ വിഷയങ്ങളിൽ യാതൊരു നടപടിയും ഉണ്ടാകാത്ത പക്ഷം ശക്തമായ പ്രക്ഷോഭവുമായി ബി ജെ പി രംഗത്തു വരുമെന്ന് പ്രതിഷേധ സമരം ഉദ്‌ഘാടനം ചെയ്തുകൊണ്ട് ബി ജെ പി മണ്ഡലം ജനറൽ സിക്രട്ടറി സത്യൻ കൊമ്മേരി പറഞ്ഞു. ഒ ബി സി മോർച്ച ജില്ലാ വൈസ് പ്രസിഡന്റ് കെ. ശിവശങ്കരൻ അദ്ധ്യക്ഷത വഹിച്ചു. എം.ബി. സതീഷ്, എൻ. രതീഷ് കുമാർ , വി. ശ്രീധരൻ, സി. പ്രകാശൻ എന്നിവർ സംസാരിച്ചു.