കേരളത്തില് വാക്സിന് ഉത്പാദന മേഖല സ്ഥാപിക്കാന് മന്ത്രിസഭായോഗം തീരുമാനിച്ചതായി മുഖ്യമന്ത്രി പിണറായി വിജയന്. തോന്നക്കലിലെ ലൈഫ് സയന്സ് പാര്ക്കില് വാക്സിന് ഉല്പ്പാദന മേഖല സ്ഥാപിക്കാനാണ് തീരുമാനം.ലൈഫ് സയന്സ് പാര്ക്കില് പൂര്ത്തിയാകുന്ന 85,000 ചതുരശ്ര അടി കെട്ടിടം വാക്സിന് ഉല്പ്പാദന യൂണിറ്റുകള് സ്ഥാപിക്കുവാന് അനുയോജ്യമാണെന്ന് കമ്ബനികള് ഉറപ്പുവരുത്തിയാല് വാര്ഷിക പാട്ടത്തിന് നല്കും.
വാക്സിന് ഉല്പ്പാദന യൂണിറ്റ് ആരംഭിക്കാന് തയ്യാറാകുന്ന ആങ്കര് വ്യവസായങ്ങള്ക്ക് പ്രത്യേക പാക്കേജ് അനുവദിക്കും. ലീസ് പ്രീമിയത്തിന്റെ 50 ശതമാനം സബ്സിഡിയോടെ 60 വര്ഷത്തേയ്ക്ക് പാട്ടത്തിന് ഭൂമി നല്കും.പാര്ക്കില് പ്രവര്ത്തിക്കുന്ന എല്ലാ കമ്ബനികള്ക്കുമായി പൊതു മലിനജല ശുദ്ധീകരണ പ്ലാന്റ്, സോളാര്പ്ലാന്റ്, ജൈവമാലിന്യ സംസ്കരണ കേന്ദ്രം എന്നിവ കേരള സ്റ്റേറ്റ് ഇന്ഡസ്ട്രിയല് ഡവലപ്പ്മെന്റ് കോര്പ്പറേഷന് നിര്മ്മിക്കും. സംസ്ഥാന സര്ക്കാരിന്റെ കീഴിലുള്ള ധനകാര്യ സ്ഥാപനങ്ങള് മുഖേന 20 വര്ഷത്തെ ദീര്ഘകാല തിരിച്ചടവ് നിശ്ചയിച്ച് ആകര്ഷകമായ വായ്പകള് നല്കും. ഫില് ഫിനിഷ് യൂണിറ്റിനുള്ള വായ്പാ പരിധി 20 കോടിരൂപയ്ക്കകത്തും വാക്സിന് ഉല്പ്പാദന യൂണിറ്റിനുള്ള വായ്പാ പരിധി 30 കോടിരൂപയ്ക്കകത്തും നിജപ്പെടുത്തും. പ്രവര്ത്തനമാരംഭിച്ച് രണ്ടുവര്ഷത്തേയ്ക്കുള്ള ബില് തുകയില് വാട്ടര് ചാര്ജ്ജ് സബ്സിഡിയും നല്കും. ഉല്പ്പാദിപ്പിക്കേണ്ട വാക്സിന്, ഉപയോഗിക്കേണ്ട സാങ്കേതികവിദ്യ, അടിസ്ഥാന സൗകര്യം തുടങ്ങിയവ കമ്ബനികള്ക്ക് തീരുമാനിക്കാം.