കോവിഡ് ദുരിതാശ്വാസ പ്രവർത്തനങ്ങളിൽ തലശേരി അതിരൂപതയുടെ പ്രവർത്തനങ്ങൾ മാതൃകാപരമെന്ന് ഭക്ഷ്യ-സിവിൽ സപ്ലൈസ് മന്ത്രി ജി.ആർ. അനിൽ. തലശേരി അതിരൂപതയുടെ നേതൃത്വത്തിൽ തായ്‌വാൻ ആസ്ഥാനമായുള്ള ബുദ്ധിസ്റ്റ് സു ചി ഫൗണ്ടേഷന്‍റെയും സെന്‍റ് കമില്ലസ് സന്യാസസമൂഹത്തിന്‍റെ കീഴിലുള്ള സ്നേഹ ചാരിറ്റബിൾ ട്രസ്റ്റിന്‍റെയും സഹായത്തോടെ കണ്ണൂർ, കാസർഗോഡ് ജില്ലകളിലായി നടത്തിയ കോവിഡ് ദുരിതാശ്വാസ കിറ്റ് വിതരണ സമാപനവും ടാസ്ക് ഫോഴ്സ് ടീം രൂപീകരണവും ഓൺലൈനായി ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി.
ഭക്ഷ്യ കിറ്റ് വിതരണവും കോവിഡ് രോഗികളെ പരിചരിക്കലും അവർക്ക് ചികിത്സാസഹായവും മറ്റും എത്തിക്കുകയും ചെയ്യുന്ന അതിരൂപതയുടെ പ്രവർത്തനങ്ങൾ ഏവരുടെയും പ്രശംസ പിടിച്ചുപറ്റിയതാണെന്നും മന്ത്രി പറഞ്ഞു. ദുരന്തങ്ങളെ നേരിടുന്നതിന് പുതുതായി ആരംഭിക്കുന്ന ടാസ്ക് ഫോഴ്സും ശ്രദ്ധേയമാണ്.-മന്ത്രി പറഞ്ഞു.
ശാന്തിനഗർ സെന്‍റ് മേരീസ് ദേവാലയ പാരിഷ് ഹാളിൽ നടന്ന ചടങ്ങിൽ ആർച്ച്ബിഷപ് മാർ ജോർജ് ഞറളക്കാട്ട് അധ്യക്ഷത വഹിച്ചു. കോവിഡ് ദുരിതാശ്വാസ പ്രവർത്തനങ്ങളിൽ തലശേരി അതിരൂപതയ്ക്ക് താങ്ങായി നിൽക്കുന്ന മുഴുവനാളുകളെയും നന്ദിയോടെ സ്മരിക്കുന്നതായി ആർച്ച്ബിഷപ് പറഞ്ഞു. സഹജീവികളെ തങ്ങളെപ്പോലെതന്നെ സ്നേഹിക്കുന്നതിന്‍റെ തെളിവാണ് ഇത്തരം സഹായങ്ങൾ. കോവിഡ് രോഗികൾക്ക് സൗകര്യങ്ങൾ കുറഞ്ഞപ്പോൾ എല്ലാ ആധുനിക സൗകര്യങ്ങളോടുംകൂടി തലശേരി അതിരൂപത ഒരുക്കിയ ആശുപത്രിയും ഏവർക്കും സഹായമാകുന്നതിലും സന്തോഷമുണ്ടെന്ന് മാർ ഞറളക്കാട്ട് പറഞ്ഞു. നാനാജാതി മതത്തിൽപ്പെട്ട പതിനയ്യായിരത്തോളം കുടുംബങ്ങൾക്ക് സഹായമെത്തിക്കാൻ കഴിഞ്ഞത് അഭിമാനത്തോടെ കാണുന്നതായി മുഖ്യപ്രഭാഷണം നടത്തിയ അതിരൂപത സഹായമെത്രാൻ മാർ ജോസഫ് പാംപ്ലാനി പറഞ്ഞു. അപരന്‍റെ വിഷമതകളിൽ അവരെ സഹായിക്കാൻ കാണിക്കുന്ന ബുദ്ധിസ്റ്റ് സു ചി ഫൗണ്ടേഷന്‍റെയും സെന്‍റ് കമില്ലസ് സന്യാസസമൂഹത്തിന്‍റെയും നല്ല മനസിന് നന്ദിയുണ്ടെന്നും മാർ പാംപ്ലാനി പറഞ്ഞു. പ്രളയകാലത്തും ഇപ്പോൾ കോവിഡ് കാലത്തും തലശേരി അതിരൂപത നടത്തുന്ന പ്രവർത്തനങ്ങൾ ഏറെ അഭിനന്ദനാർഹമാണെന്ന് ടാസ്ക് ഫോഴ്സ് ലോഗോ പ്രകാശനം ചെയ്തു പ്രസംഗിക്കവെ സജീവ് ജോസഫ് എംഎൽഎ പറഞ്ഞു.
പയ്യാവൂർ പഞ്ചായത്ത് പ്രസിഡന്‍റ് സാജു സേവ്യർ ടാസ്ക് ഫോഴ്സ് ക്യാന്പ് ഉദ്ഘാടനം ചെയ്തു. ടാസ്ക് ഫോഴ്സ് യൂണിഫോം ഉദ്ഘാടനം മംഗളൂരു സ്നേഹ ചാരിറ്റബിൾ ട്രസ്റ്റ് ഡയറക്‌ടർ ഫാ. സിബി കൈതാരൻ നിർവഹിച്ചു. വാർഡ് മെംബർ ജിൽസൻ കണികതോട്ടം, ഫാ. തോമസ് തയ്യിൽ, ദീപിക കണ്ണൂർ റസിഡന്‍റ് മാനേജർ ഫാ. സെബാൻ ഇടയാടിയിൽ, അതിരൂപത പാസ്റ്ററൽ കൗൺസിൽ സെക്രട്ടറി ജോർജ് തയ്യിൽ തുടങ്ങിയവർ പ്രസംഗിച്ചു.
ബുദ്ധിസ്റ്റ് സു ചി ഫൗണ്ടേഷൻ ഇന്ത്യയിൽ പത്തു സംഘടനകൾ വഴി 17 സംസ്ഥാനങ്ങളിലായി 35 കേന്ദ്രങ്ങളിലൂടെ സഹായം നൽകിവരുന്നു. സെന്‍റ് കമില്ലൻ ഫാദേഴ്സിന്‍റെ ജീവകാരുണ്യപ്രവർത്തനങ്ങൾ ഏകോപിപ്പിക്കുന്ന പ്രസ്ഥാനമാണ് സ്നേഹ ചാരിറ്റബിൾ ട്രസ്റ്റ്. 2018-19ലെ പ്രളയം, കോവിഡ് പ്രതിരോധ പ്രവർത്തനങ്ങൾ എന്നിവയിൽ നിറസാന്നിധ്യമായിരുന്നു കമില്ലൻഫാദേഴ്സ്.
അതിരൂപതയുടെ കോവിഡ് ദുരിതാശ്വാസ പ്രവർത്തനങ്ങൾ മാതൃകാപരം: മന്ത്രി അനിൽ
