ഇരിട്ടി : ഇരിട്ടി താലൂക്ക് ഓഫീസിലെ മൂന്ന് ജീവനക്കാർക്ക് ഡെങ്കിപ്പനി റിപ്പോർട്ട് ചെയ്തു. ഇതിനെത്തുടർന്ന് ഇരിട്ടി താലൂക്ക് ആശുപത്രിയുടെയും , ജില്ലാ വെക്ടർ കൺട്രോൾ യൂണിറ്റിൻ്റെയും , മട്ടന്നൂർ ഫീൽഡ് സ്റ്റേഷൻ്റെയും സംയുക്താഭിമുഖ്യത്തിൽ പ്രതിരോധപ്രവർത്തനങ്ങൾ ഊർജിതമാക്കി.
കഴിഞ്ഞ ദിവസമാണ് ഇരിട്ടി താലൂക്ക് ഓഫീസിലെ 3 ജീവനക്കാർക്ക് ഡെങ്കിപ്പനി സ്ഥിരീകരിച്ചത്. ഇതേതുടർന്നാണ് പ്രതിരോധ പ്രവർത്തനങ്ങൾ ഊര്ജിതമാക്കിയത്. ഇരിട്ടി താലൂക്ക് ഓഫീസും പരിസരത്തുമുള്ള കെട്ടിടങ്ങൾ മുഴുവൻ ആരോഗ്യ പ്രവർത്തകർ പരിശോധന നടത്തി. കൊതുകുകളുടെയും കൂത്താടികളുടെയും ഉറവിടങ്ങൾ കണ്ടെത്തുകയും അവ നശിപ്പിക്കുകയും ചെയതു. വെള്ളം കെട്ടിക്കിടക്കുന്ന ഓവുചാലുകൾ കീടനാശിനി തളിക്കുകയും ചെയ്തു. പ്രതിരോധ പ്രവർത്തനങ്ങൾക്ക് താലൂക്കാശുപത്രി ഹെൽത്ത് ഇൻസ്പെക്ടർ ഇ. മനോജ്, ജൂനിയർ ഹെൽത്ത് ഇൻസ്പെക്ടർ അനിൽകുമാർ, വെക്ടർ കൺട്രോൾ ഫീൽഡ് അസിസ്റ്റൻറ് എം.രാജൻ, ഫീൽഡ് വർക്കർമാരായ ശൈലജ, ശ്രീജ, പ്രജീഷ്, സീന, വാർഡ് കൗൺസിലർ അബ്ദുൽ റഷീദ് തുടങ്ങിയവർ നേതൃത്വം നൽകി.