ശബരിമലയില് ദര്ശനത്തിനുള്ള വെര്ച്വല് ക്യൂ ബുക്കിംഗ് റദ്ദാക്കാനും ഭക്തര്ക്ക് സ്പോട്ട് ബുക്കിംഗിനു സൗകര്യം നല്കാനും സ്വീകരിച്ച നടപടികള് വ്യക്തമാക്കി സര്ക്കാര് സത്യവാങ്മൂലം നല്കണമെന്ന് ഹൈക്കോടതി നിര്ദേശം നല്കി.
ജസ്റ്റീസ് അനില് കെ. നരേന്ദ്രന്, ജസ്റ്റീസ് പി.ജി. അജിത് കുമാര് എന്നിവരുള്പ്പെട്ട ഡിവിഷന് ബെഞ്ചിന്റേതാണ് നിര്ദേശം.
മണ്ഡല മകരവിളക്ക് സീസണ് അടുത്തുവരുന്ന സാഹചര്യത്തില് ഇക്കാര്യത്തില് സ്വീകരിച്ച നടപടികള് അറിയിക്കാനാണ് ഡിവിഷന് ബെഞ്ച് നിര്ദേശിച്ചിട്ടുള്ളത്. തിരക്കിട്ട് വെര്ച്വല് ക്യൂ സംവിധാനം ഏറ്റെടുക്കാന് കഴിയില്ലെന്നും ഇതിനായി വെബ്സൈറ്റിന് രൂപം നല്കുന്നതിനും മറ്റും കൂടുതല് സമയം വേണമെന്നും നേരത്തെ തിരുവിതാംകൂര് ദേവസ്വം ബോര്ഡും ഹൈക്കോടതിയെ അറിയിച്ചിരുന്നു.