ചിറയിൻകീഴിൽ വീടിനു നേരെ വീണ്ടും സ്ഫോടക വസ്തു എറിഞ്ഞു, സിസിടിവിയിൽ സമാന ദൃശ്യം; ഹെൽമെറ്റും റെയിൻകോട്ടും ധരിച്ചവർ ദൃശ്യങ്ങളില്
തിരുവനന്തപുരം: ചിറയിൻകീഴിൽ വീടിനു നേരെ വീണ്ടും സ്ഫോടക വസ്തു എറിഞ്ഞു. പുതുക്കരി വയലിൽ വീട് വിജയന്റെ വീടിനുനേരെയാണ് ബോംബേറുണ്ടായത്. കഴിഞ്ഞ ദിവസം അർധരാത്രി 12:45-ഓടെയാണ് സംഭവം. ഹെൽമെറ്റും റെയിൻകോട്ടും ധരിച്ചെത്തിയ രണ്ടുപേർ വീട് ലക്ഷ്യമാക്കി നാല് തവണയാണ് സ്ഫോടകവസ്തു എറിഞ്ഞത്. ഇതിൽ മൂന്നെണ്ണം വൻ ശബ്ദത്തോടെ പൊട്ടിത്തെറിച്ചു. ഒരെണ്ണം പൊട്ടാത്ത നിലയിൽ കണ്ടെത്തി.ഫോറൻസിക് സംഘം സ്ഥലത്തെത്തി പരിശോധന നടത്തി. ഒമ്പത് മാസംമുമ്പ് ഇതേവീടിന് അക്രമികൾ തീയിട്ടിരുന്നു. ഒരാഴ്ചമുമ്പ് പ്രദേശത്തെ സിപിഎം ശാർക്കര ലോക്കൽ കമ്മിറ്റി അംഗവും മുൻ പഞ്ചായത്ത് അംഗവുമായിരുന്ന ബീജ സുരേഷിന്റെ വീടിനും അജ്ഞാതസംഘം ബോംബെറിഞ്ഞിരുന്നു.
സിസിടിവി ദൃശ്യങ്ങളിൽ മഴക്കോട്ട് ധരിച്ച് ബൈക്കിലെത്തിയ മൂന്നുപേരാണ് ആക്രമണത്തിന് പിന്നിലെന്ന് വ്യക്തമായിരുന്നു. എന്നാൽ ഈ സംഭവത്തിൽ ഇതുവരെ പ്രതികളെ പിടികൂടിയിട്ടില്ല. ആക്രമണത്തിന് പിന്നിൽ ക്വട്ടേഷൻ സംഘമാകാമെന്നാണ് പൊലീസ് സംശയിക്കുന്നത്. എന്നാൽ ആദ്യത്തെ സംഭവത്തിൽ പ്രതികളെ പിടികൂടാനാകാത്തതാണ് വീണ്ടും ആക്രമണം ഉണ്ടാകാൻ കാരണമെന്ന് നാട്ടുകാർ പറയുന്നു.
