തിരുവനന്തപുരം: പാർട്ടി നേതാക്കന്‍മാരുടെ മക്കള്‍ക്കെതിരായ ആരോപണങ്ങളില്‍ സിപിഎം ഇരട്ട നിലപാട് സ്വീകരിക്കുന്നുവെന്ന ആക്ഷേപം ശക്തമാകുന്നു. ബിനീഷ് കോടിയേരിക്കെതിരെ ആരോപണം വന്നപ്പോള്‍ പ്രതികരിക്കാതിരുന്ന പാർട്ടി, മുഖ്യമന്ത്രിയുടെ മകള്‍ക്കെതിരെ ആരോപണം വന്നപ്പോള്‍ പ്രതിരോധം തീർക്കുന്നത് ഉയർത്തിയാണ് വിമർശനം ശക്തമാകുന്നത്.
ബിനീഷിന്റെ കേസിൽ പാർട്ടി ഇടപെടില്ലെന്ന് കോടിയേരി അന്ന് പറഞ്ഞിരുന്നു. രണ്ട് പേരുടേയും കാര്യത്തിൽ ഒരേ നിലപാട് തന്നെയാണെന്നാണ് സിപിഎം സംസ്ഥാന സെക്രട്ടറി എം വി ഗോവിന്ദൻ പറയുന്നത്
മയക്കുമരുന്ന് കേസില്‍ ബിനീഷ് കോടിയേരി അറസ്റ്റിലായപ്പോള്‍ പാര്‍ട്ടി സംസ്ഥാന സെക്രട്ടറി ആയിരുന്ന കോടിയേരി ബാലകൃഷ്ണന്‍റെ പ്രതികരണം ഇതായിരുന്നു. ബിനീഷിന്റെ കേസില്‍ പാര്‍ട്ടി ഇടപെടില്ലെന്ന് സംശയങ്ങള്‍ക്കിട നല്‍കാതെ കോടിയേരി വ്യക്തമാക്കി. പാര്‍ട്ടി ഒരു സംരക്ഷണവും ബിനീഷിന് നല്‍കിയതുമില്ല. ഒരു പ്രസ്താവനയും ഇറക്കിയതുമില്ല. ഇതും മുഖ്യമന്ത്രി പിണറായി വിജയന്‍റെ മകള്‍ വീണ വിജയനെതിരെ ഉയര്‍ന്ന മാസപ്പടി വിവാദവുമായിട്ടാണ് ചില പാര്‍ട്ടി അണികളും പ്രതിപക്ഷത്തെ അപൂ‍ര്‍വ്വം ചിലരും താരതമ്യം ചെയ്യുന്നത്.
വീണക്കെതിരെ ആരോപണം ഉയര്‍ന്ന അധികം വൈകാതെ സിപിഎം സംസ്ഥാനസെക്രട്ടറിയേറ്റ് പ്രസ്താവന ഇറക്കി.വീണക്കെതിരായ വാര്‍ത്തകള്‍ക്ക് പിന്നില്‍ ഗൂഡാലോചനയുണ്ടെന്നായിരുന്നു സിപിഎം പ്രസ്താവന. വീണയെ ന്യായീകരിച്ച് സിപിഎം സംസ്ഥാന സെക്രട്ടറി തന്നെ എത്തി. വീണയുടേയും ബിനീഷിന്‍റേയും ഒരേ നിലപാട് അല്ലായിരുന്നെങ്കിലും അങ്ങനെയായിരുന്നുവെന്നാണ് എം വി ഗോവിന്ദന്‍ പറയുന്നത്