ആറളം ഫാമിൽ നിന്നുള്ള കാട്ടാനശല്യം രൂക്ഷം: കീഴപ്പള്ളി അമ്പലക്കണ്ടിയിൽ ജനകീയമായി സ്ഥാപിച്ച തൂക്ക് വൈദ്യുതി വേലി തകർന്നു
കീഴപ്പള്ളി:ആറളം ഫാമിൽ നിന്നുള്ള കാട്ടാനകൾ ജനവാസമേഖലയിലേക്ക് ഇറങ്ങുന്നത് പതിവായതോടെ, കീഴപ്പള്ളി അമ്പലക്കണ്ടി മേഖലയിൽ ജനകീയമായി സ്ഥാപിച്ച ആനപ്രതിരോധ തൂക്ക് വൈദ്യുതി വേലി തകർന്ന നിലയിൽ. ആറളം ഫാമും കീഴപ്പള്ളി അമ്പലക്കണ്ടി മേഖലയും തമ്മിൽ ബന്ധിപ്പിക്കുന്ന അമ്പലക്കണ്ടി പുഴയുടെ കരയിലാണ് നാട്ടുകാരുടെ നേതൃത്വത്തിൽ ഈ തൂക്ക് വൈദ്യുതി വേലി നേരത്തെ സ്ഥാപിച്ചിരുന്നത്.
ഫാമിൽ നിന്ന് കാട്ടാനകൾ നേരിട്ട് ജനവാസ മേഖലയിലേക്ക് കടക്കുന്നത് തടയുക എന്ന ലക്ഷ്യത്തോടെയായിരുന്നു ഈ പ്രതിരോധ സംവിധാനം ഒരുക്കിയത്. എന്നാൽ നിലവിൽ വേലി പല ഭാഗങ്ങളിലും തകർന്ന നിലയിലാണ്. ചിലയിടങ്ങളിൽ വേലി പൂർണ്ണമായും അപ്രത്യക്ഷമായിട്ടുണ്ട്.
ഇതോടെ കാട്ടാനകൾ തടസ്സങ്ങളൊന്നുമില്ലാതെ ജനവാസ മേഖലയിലേക്ക് ഇറങ്ങി കാർഷിക വിളകളും മറ്റും വ്യാപകമായി നശിപ്പിക്കുന്നത് നിത്യസംഭവമായി മാറിയിരിക്കുകയാണ്. ജനങ്ങളുടെ ജീവനും സ്വത്തിനും കനത്ത ഭീഷണിയായിരിക്കുന്ന ഈ സാഹചര്യത്തിൽ, പഞ്ചായത്ത് അധികൃതരും വനം വകുപ്പും അടിയന്തരമായി ഇടപെട്ട് തകർന്ന തൂക്ക് വൈദ്യുതി വേലി എത്രയും പെട്ടെന്ന് പുനസ്ഥാപിക്കണമെന്നാണ് നാട്ടുകാരുടെ ശക്തമായ ആവശ്യം.
