ചിലിയൻ ഫുട്ബോൾ വമ്പന്മാരായ കോളോ-കോളോയ്ക്കൊപ്പം തന്റെ കരിയറിലെ ആദ്യ ലീഗ് കിരീടം നേടിയ സന്തോഷത്തിലാണ് കേപ് വെർഡെയുടെ 40കാരനായ ഗോൾകീപ്പർ വോസിഞ്ഞ. ഞായറാഴ്ച നടന്ന നിർണായക മത്സരത്തിൽ ന്യൂബ്ലെൻസെയെ ഒന്നിനെതിരെ രണ്ട് ഗോളുകൾക്ക് തോൽപ്പിച്ചാണ് കോളോ-കോളോ ക്ലബ്ബിന്റെ ചരിത്രത്തിലെ 35-ാം ലീഗ് കിരീടം ഉറപ്പിച്ചത്. മത്സരത്തിൽ വോസിഞ്ഞ ആദ്യ ഇലവനിൽ തന്നെ കളത്തിലിറങ്ങിയിരുന്നു.
“ഈ കിരീടം നേടാനാണ് ഞാൻ ഇവിടെ എത്തിയത്,” മത്സരശേഷം വോസിഞ്ഞ പറഞ്ഞു. “എനിക്ക് വളരെ സന്തോഷമുണ്ട്. ദൈവത്തിന് നന്ദി, ഈ വലിയ കിരീടം നേടാൻ ഞങ്ങൾക്ക് കഴിഞ്ഞു. ആദ്യ ദിവസം മുതൽ എന്നെ കുടുംബത്തെപ്പോലെ സ്വീകരിച്ച എല്ലാ സഹതാരങ്ങൾക്കും ഡയറക്ടർമാർക്കും പരിശീലകർക്കും കോളോ-കോളോയിലെ മുഴുവൻ ആളുകൾക്കും ഞാൻ നന്ദി രേഖപ്പെടുത്തുന്നു.”
മുമ്പ് 2015ൽ കേപ് വെർഡെൻ ഫുട്ബോൾ ചാമ്പ്യൻഷിപ്പും 2019ൽ എഇഎൽ ലിമാസോളിനൊപ്പം സൈപ്രിയോട്ട് കപ്പും നേടിയ വോസിഞ്ഞ, ഫൈനൽ വിസിലിനു ശേഷം അതീവ സന്തോഷവാനായിരുന്നു. 2026ലെ ലോകകപ്പിലെ മികച്ച പ്രകടനത്തിലൂടെ ലോകശ്രദ്ധ നേടിയ ശേഷമാണ് ഓഗസ്റ്റിൽ അദ്ദേഹം ചിലിയൻ ക്ലബ്ബിലേക്ക് ചേക്കേറുന്നത്. ക്ലബ്ബിലെ ആദ്യ മാസത്തിൽ ഫോം കണ്ടെക്കാൻ ബുദ്ധിമുട്ടിയെങ്കിലും, സെപ്റ്റംബർ മുതൽ അദ്ദേഹം ടീമിലെ പ്രധാന ഗോൾകീപ്പറായി തുടരുകയായിരുന്നു.
