ഏഷ്യൻ ഗെയിംസ് ക്രിക്കറ്റ്: മഴ മൂലം അഫ്ഗാനിസ്ഥാനെതിരായ ക്വാർട്ടർ ഫൈനൽ ഉപേക്ഷിച്ചു, ഇന്ത്യ സെമിയിൽ

ഇന്ന് നടക്കേണ്ടിയിരുന്ന ഏഷ്യൻ ഗെയിംസ് പുരുഷ ക്രിക്കറ്റിലെ ഇന്ത്യ-അഫ്ഗാനിസ്ഥാൻ രണ്ടാം ക്വാർട്ടർ ഫൈനൽ മത്സരം കനത്ത മഴയെ തുടർന്ന് ഉപേക്ഷിച്ചു. ജപ്പാനിലെ നിഷിനിലുള്ള ഐച്ചി പ്രിഫെക്ചറൽ കൊറോഗി സ്പോർട്സ് പാർക്കിൽ നടക്കേണ്ടിയിരുന്ന മത്സരമാണ് ഒരു പന്തുപോലും എറിയാതെ ഉപേക്ഷിച്ചത്. ഇതോടെ ഇന്ത്യ സെമി ഫൈനലിലേക്ക് പ്രവേശിച്ചു.

ടൂർണമെന്റിലെ നോക്കൗട്ട് നിയമങ്ങൾ അനുസരിച്ച്, ഉയർന്ന സീഡിങ്ങും മികച്ച ഐസിസി ടി20 റാങ്കിംഗും ഉള്ള ടീം എന്ന നിലയിലാണ് ഇന്ത്യ സെമി ഫൈനലിലേക്ക് യോഗ്യത നേടിയത്. ശ്രീലങ്കയും നേപ്പാളും തമ്മിലുള്ള ക്വാർട്ടർ ഫൈനൽ മത്സരത്തിലെ വിജയികളെയായിരിക്കും
സെമി ഫൈനലിൽ ഇന്ത്യ നേരിടുക.

മറ്റൊരു ക്വാർട്ടർ ഫൈനൽ മത്സരവും മഴ കാരണം ഉപേക്ഷിച്ചിരുന്നു. പാകിസ്ഥാൻ – ചൈന മത്സരമാണ് ഉപേക്ഷിച്ചത്. തുടർന്ന് ഉയർന്ന റാങ്കിംഗിന്റെ അടിസ്ഥാനത്തിൽ ചൈനയെ മറികടന്ന് പാകിസ്ഥാൻ ‌സെമി ഫൈനലിലേക്ക് യോഗ്യത നേടി. അതേസമയം സ്വർണത്തിൽ കുറഞ്ഞതൊന്നും നിലവിലെ ചാമ്പ്യന്മാരായ ഇന്ത്യ പ്രതീക്ഷിക്കുന്നില്ല. 2023ൽ ഹാംഗ്ഷൂവിൽ നടന്ന ഏഷ്യൻ ഗെയിംസിൽ നേടിയ സ്വർണ്ണമെഡൽ നിലനിർത്താനാകുമെന്ന ഉറച്ച പ്രതീക്ഷയിലാണ് ടീം ഇന്ത്യ.