കാനഡയില് ഇന്ത്യക്കാരിയുടെ കാലില് തൊട്ട് അനുഗ്രഹം വാങ്ങുന്നതിനിടെ 20 ലക്ഷത്തിന്റെ സ്വര്ണം കവര്ന്നു
ഒട്ടാവ: കാനഡയിലെ ബ്രാംടണില് 78 വയസുള്ള ഇന്ത്യക്കാരിയുടെ 20 ലക്ഷം രൂപയുടെ സ്വര്ണാഭരണങ്ങള് തട്ടിയെടുത്തു. കാലില് തൊട്ട് അനുഗ്രഹം വാങ്ങുന്നതുപോലെ അഭിനയിച്ച് അടുത്തെത്തിയ കനേഡിയന് യുവതിയാണ് വയോധികയുടെ ആഭരണങ്ങള് ഊരിയെടുത്തത്. സംഭവത്തില് വയോധികയുടെ മകന് രാഘവേന്ദ്ര കുമാര് പൊലിസില് പരാതി നല്കിയിട്ടുണ്ട്.
വൈകുന്നേരങ്ങളില് വയോധിക പതിവായി നടക്കാനിറങ്ങാറുള്ളതാണ്. ഇവര് നടന്നുപോകുന്നതിനിടെ സമീപത്ത് ഒരു കാര് നിര്ത്തുകയും അതില് നിന്നിറങ്ങിയ യുവതി വയോധികയുടെ അടുത്തേക്ക് വരികയും ചെയ്തു. തുടര്ന്ന് കുനിഞ്ഞ് അനുഗ്രഹം വാങ്ങുന്നതുപോലെ കാലില് തൊടുകയും പിന്നാലെ വയോധികയെ കെട്ടിപ്പിടിച്ച് വളകളും മാലയും ഉള്പ്പെടെയുള്ള ആഭരണങ്ങള് ഊരിയെടുക്കുകയുമായിരുന്നു. ഏകദേശം 110 ഗ്രാം സ്വര്ണാഭരണങ്ങളാണ് നഷ്ടമായത്.
സംഭവത്തിന് ശേഷം വീട്ടിലെത്തിയ അമ്മയ്ക്ക് ഏകദേശം അരമണിക്കൂറോളം സംസാരിക്കാന് പോലും കഴിഞ്ഞിരുന്നില്ലെന്നും വിറച്ചുകൊണ്ടാണ് വീട്ടില് തിരിച്ചെത്തിയതെന്നും മകന് രാഘവേന്ദ്ര കുമാര് പറഞ്ഞു. സംഭവത്തിൽ കേസെടുത്ത പൊലിസ് മോഷ്ടാവിനായി തെരച്ചിൽ ആരംഭിച്ചിട്ടുണ്ട്.
