ആഗ്ര: ലക്നോ-ആഗ്ര എക്സ്പ്രസ് വേയിൽ കാർ മറിഞ്ഞ് മൂന്ന് യുവാക്കൾ മരിച്ചു. രണ്ട് പേർക്ക് ഗുരുതരമായി പരിക്കേറ്റു. ഡൽഹി സ്വദേശികളായ ജയ്പ്രകാശ് (32), ഭൂപേന്ദ്ര (35), കപിൽ (31) എന്നിവരാണ് മരിച്ചത്. യശ്വന്ത് (33), ചന്ദ്രകാന്ത് (35) എന്നിവർക്കാണ് പരിക്കേറ്റത്. ശനിയാഴ്ച രാവിലെ ഏഴരയ്ക്കായിരുന്നു സംഭവം.
ഡൽഹിയിൽ നിന്ന് ബല്ലിയയിലേക്ക് ജോലിക്കായി പോവുകയായിരുന്ന യുവാക്കളാണ് അപകടത്തിൽപ്പെട്ടത്. യശ്വന്തായിരുന്നു കാർ ഓടിച്ചിരുന്നത്. ജയ്പ്രകാശ്, ഭൂപേന്ദ്ര, കപിൽ എന്നിവർ കാറിന്റെ പിൻസീറ്റിലിരിക്കുകയായിരുന്നു. അപകടത്തിൽ കാറിൽ നിന്ന് പുറത്തേക്ക് തെറിച്ചുവീണാണ് ഇവർ മരിച്ചത്.
അമിതവേഗത്തിലെത്തിയ കാർ നിയന്ത്രണം വിട്ട് മറിയുകയായിരുന്നു. വിവരമറിഞ്ഞ് സ്ഥലത്തെത്തിയ പൊലിസ് പരിക്കേറ്റവരെ ആശുപത്രിയിലേക്ക് മാറ്റുകയും മരിച്ചവരുടെ മൃതദേഹങ്ങൾ പോസ്റ്റ്മോർട്ടത്തിനായി അയക്കുകയും ചെയ്തു. സംഭവത്തിൽ പൊലിസ് മേൽനടപടികൾ സ്വീകരിച്ചിട്ടുണ്ട്.
