അടൂരിൽ ദളിത് യുവാവിന്റെ ജനനേന്ദ്രിയം തകർത്ത പൊലീസ് മർദ്ദനം, കൂടുതൽ ഉദ്യോഗസ്ഥർക്കെതിരെ നടപടി

അടൂർ: അടൂരിൽ ദളിത് യുവാവിനെ മർദ്ദിച്ച സംഭവത്തിൽ കൂടുതൽ ഉദ്യോഗസ്ഥർക്കെതിരെ നടപടി. എസ്ഐ അടക്കം രണ്ടുപേരെക്കൂടി സസ്പെൻഡ് ചെയ്തു. നിലവിൽ കാസർഗോഡ് ബേക്കൽ സ്റ്റേഷനിലെ പ്രിൻസിപ്പൽ എസ്ഐ കെ. പി ശരത്, പൊലീസ് ഡ്രൈവർ ജെ. കെ ഫൈസൽ എന്നിവർക്കെതിരെയാണ് നടപടി. മുൻപ് ഇവർ ശാസ്താംകോട്ട സ്റ്റേഷനിൽ ആയിരുന്നു ജോലി ചെയ്തത്. ആദ്യഘട്ട നടപടിയുടെ ഭാഗമായി രണ്ട് ഉദ്യോഗസ്ഥരെ മുൻപ് സസ്പെൻഡ്‌ ചെയ്തിരുന്നു. ശാസ്താംകോട്ട സ്റ്റേഷനിലെ നാല് ഉദ്യോഗസ്ഥർ ആയിരുന്നു ആരോപണവിധേയർ. ദളിത് യുവാവിന്റെ ജനനേന്ദ്രിയം അടക്കം തകർത്ത പൊലീസ് മർദ്ദനത്തേക്കുറിച്ച് ഏഷ്യാനെറ്റ് ന്യൂസ് വാർത്ത നൽകിയിരുന്നു.വാർത്ത ശ്രദ്ധയിൽപ്പെട്ട മുൻ മന്ത്രി പി പ്രസാദ് നൽകിയ പരാതിയിലാണ് ആഭ്യന്തര വകുപ്പ് അന്വേഷണത്തിന് പ്രത്യേക പൊലീസ് സംഘത്തെ നിയോഗിച്ചത്. പോക്സോ കേസിൽ പ്രതിയായ ഇളയ സഹോദരനെ അന്വേഷിച്ച് എത്തിയ പോലീസ് സംഘം 23 കാരനെ കാറിൽ കയറ്റി കൊണ്ടുപോയി ക്രൂരമായി മർദിക്കുകയായിരുന്നു. ജനനേന്ദ്രിയം തകർത്തായിരുന്നു പൊലീസ് മർദ്ദനം.