എയർ ഇന്ത്യ വിമാനം 300 അടി താഴ്ചയിലേക്ക് വീണ സംഭവം; യഥാർത്ഥ കാരണത്തേക്കുറിച്ച് വീണ്ടും സംശയങ്ങൾ

ഡൽഹി: ഫൂക്കറ്റിൽ നിന്ന് ഡൽഹിയിലേക്ക് വരികയായിരുന്ന എയർ ഇന്ത്യ വിമാനം പൊടുന്നനെ 300 അടി താഴ്ചയിലേക്ക് പതിച്ച സംഭവത്തിലെ യഥാർത്ഥ കാരണത്തേക്കുറിച്ച് നിരവധി സംശയങ്ങൾ ശക്തമാകുന്നു. ഓഗസ്റ്റ് 4-ന് എയർബസ് എ320 വിമാനം പറക്കുന്നതിനിടെ പെട്ടെന്ന് ഏകദേശം 300 അടി താഴ്ചയിലേക്ക് പതിക്കുകയായിരുന്നു. ഇതിനെത്തുടർന്ന് യാത്രക്കാർക്കും വിമാനത്തിലെ ജീവനക്കാർക്കും പരിക്കേൽക്കുകയും ക്യാബിനുള്ളിൽ കടുത്ത പരിഭ്രാന്തി സൃഷ്ടിക്കപ്പെടുകയും ചെയ്തു. യാത്രക്കാരിൽ ചിലർക്ക് നട്ടെല്ലിന് ഗുരുതരമായി പരിക്കേറ്റിട്ടുണ്ട്. അപകടത്തെത്തുടർന്ന് വിമാനം സുരക്ഷിതമായി ഡൽഹിയിൽ ഇറക്കുകയായിരുന്നു. സംഭവത്തെക്കുറിച്ച് എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോ അന്വേഷണം ആരംഭിച്ചു.