പഞ്ചായത്ത് പ്രസിഡന്റിന്റെ അടിയന്തര ഇടപെടൽ ; കേളകം പി. എച്ച്.സിയിൽ നാളെ മുതൽ ടോക്കൺ സംവിധാനം പുനസ്ഥാപിക്കുന്നു.
കേളകം: കേളകം പ്രാഥമിക ആരോഗ്യ കേന്ദ്രത്തിൽ ടോക്കൺ സംവിധാനം പ്രവർത്തനരഹിതമായത് മൂലം രോഗികൾ നേരിടുന്ന ദുരിതം ചൂണ്ടിക്കാട്ടിയതിനെ തുടർന്ന് പഞ്ചായത്ത് പ്രസിഡന്റിന്റെ അടിയന്തര ഇടപെടൽ. നാളെ മുതൽ ആരോഗ്യ കേന്ദ്രത്തിൽ ടോക്കൺ സംവിധാനം വീണ്ടും പ്രവർത്തനക്ഷമമാക്കുമെന്ന് കേളകം ഗ്രാമപഞ്ചായത്ത് പ്രസിഡൻ്റ് ലിസി ജോസഫ് അറിയിച്ചു.
ആശുപത്രിയിൽ എത്തുന്ന രോഗികളിൽ ഭൂരിഭാഗം പേരും ഒരു പ്രത്യേക ഡോക്ടറെ മാത്രം കാണാൻ താൽപര്യപ്പെടുന്നതാണ് ടോക്കൺ സംവിധാനം ഫലപ്രദമായി നടപ്പാക്കുന്നതിന് തടസ്സമായതെന്ന് പ്രസിഡൻ്റ് വ്യക്തമാക്കി. ഇതുമൂലം ടോക്കൺ ക്രമം പാലിക്കുന്നതിൽ പ്രായോഗിക ബുദ്ധിമുട്ടുകൾ നേരിടേണ്ടി വന്നിരുന്നു. എന്നിരുന്നാലും, രോഗികൾ അനുഭവിക്കുന്ന പ്രയാസങ്ങൾ ഗൗരവമായി പരിഗണിച്ചാണ് സംവിധാനം വീണ്ടും കാര്യക്ഷമമായി നടപ്പാക്കാൻ തീരുമാനിച്ചതെന്ന് പ്രസിഡണ്ട് പറഞ്ഞു.ടോക്കൺ സംവിധാനം പ്രവർത്തനരഹിതമായതിനാൽ ആശുപത്രിയിൽ എത്തുന്ന രോഗികൾക്ക് ഏറെ നേരം കാത്തുനിൽക്കേണ്ട സാഹചര്യമുണ്ടായിരുന്നു. പ്രായമായവർക്കും സ്ത്രീകൾക്കും കുട്ടികളുമായി എത്തുന്നവർക്കും ഇത് വലിയ ബുദ്ധിമുട്ടായി മാറി. ടോക്കൺ സംവിധാനം പുനഃസ്ഥാപിക്കണമെന്ന ആവശ്യം വിവിധ ഭാഗങ്ങളിൽ നിന്ന് ഉയർന്നിരുന്നു.
കേളകം പ്രാഥമിക ആരോഗ്യ കേന്ദ്രത്തിൽ ടോക്കൺ സംവിധാനം പ്രവർത്തന രഹിതമായിരുന്നു ഇതുമൂലം രോഗികൾ ബുദ്ധിമുട്ട് നേരിട്ടിരുന്നു ഇതിനെ തുടർന്നാണ് പഞ്ചായത്ത് പ്രസിഡന്റിന്റെ നേതൃത്വത്തിൽ വിഷയത്തിൽ ഇടപെടലുണ്ടായതും അടിയന്തര നടപടി സ്വീകരിച്ചതും.
നാളെ മുതൽ ടോക്കൺ സംവിധാനം പ്രവർത്തനം ആരംഭിക്കുന്നതോടെ രോഗികൾക്ക് സുഗമമായ സേവനം ലഭ്യമാകുമെന്നും കാത്തിരിപ്പ് സമയം കുറയുമെന്നും പ്രതീക്ഷിക്കുന്നു. രോഗികളുടെ സൗകര്യം മുൻനിർത്തി ആരോഗ്യ കേന്ദ്രത്തിലെ സേവനങ്ങൾ കൂടുതൽ മെച്ചപ്പെടുത്തുന്നതിനുള്ള നടപടികൾ തുടരുമെന്നും പഞ്ചായത്ത് അധികൃതർ അറിയിച്ചു.
